៤. បរិញ្ញេយ្យសុត្តវណ្ណនា

១០៦. បរិញ្ញេយ្យេតិ ឯត្ថ តិស្សោ បរិញ្ញា ញាតបរិញ្ញា, តីរណបរិញ្ញា, បហានបរិញ្ញាតិ. តាសុ ញាតបរិញ្ញា យាវទេវ តីរណបរិញ្ញត្ថា. តីរណបរិញ្ញា ច យាវទេវ បហានបរិញ្ញត្ថាតិ. តត្ថ ឧក្កដ្ឋាយ បរិញ្ញាយ កិច្ចទស្សនវសេន អត្ថំ ទស្សេន្តោ ‘‘បរិញ្ញេយ្យេតិ បរិជានិតព្ពេ សមតិក្កមិតព្ពេ’’តិ, បហាតព្ពេតិ អត្ថោ. តេនាហ ភគវា – ‘‘កតមា ច, ភិក្ខវេ, បរិញ្ញា? រាគក្ខយោ, ទោសក្ខយោ, មោហក្ខយោ’’តិ, តស្មា សមតិក្កមន្តិ, សមតិក្កន្តំ បហានស្ស ឧបាយំ. សមតិក្កមិត្វា ឋិតន្តិ បជហិត្វា ឋិតន្តិ អយមេត្ថ អត្ថោ.

បរិញ្ញេយ្យសុត្តវណ្ណនា និដ្ឋិតា.