២. ពឡិសសុត្តវណ្ណនា

១៥៨. ពឡិសេន ចរតិ, តេន វា ជីវតីតិ ពាឡិសិកោ. តេនាហ ‘‘ពឡិសំ គហេត្វា ចរមានោ’’តិ. អាមិសគតន្តិ អាមិសូបគតំ អាមិសបតិតំ. តេនាហ ‘‘អាមិសមក្ខិត’’ន្តិ. ភិន្នាធិករណានម្បិ ពាហិរត្ថសមាសោ ហោតេវាតិ អាហ ‘‘អាមិសេ ចក្ខុទស្សន’’ន្តិ. អយោ វុច្ចតិ សុខំ, តព្ពិធុរតាយ អនយោ, ទុក្ខន្តិ អាហ ‘‘ទុក្ខំ បត្តោ’’តិ. អស្សាតិ ឯតេន. កត្តុអត្ថេ ហិ ឯតំ សាមិវចនំ. យថា កិលេសា វត្តន្តិ, ឯវំ បវត្តមានោ បុគ្គលោ កិលេសវិប្បយោគោ ន ហោតីតិ វុត្តំ ‘‘យថា កិលេសមារស្ស កាមោ, ឯវំ កត្តព្ពោ’’តិ.

ពឡិសសុត្តវណ្ណនា និដ្ឋិតា.