៧. នាគទត្តសុត្តវណ្ណនា

២២៧. អតិកាលេនាតិ អតិវិយ បុព្ពណ្ហកាលេន, កាលស្សេវាតិ អត្ថោ. កោដិសម្មុញ្ជនិយាតិ សម្មុញ្ជនិកោដិយា, សម្មុញ្ជនិយា ឯកទេសេនេវាតិ អត្ថោ. ឥមិនា សម្មជ្ជនេ អមនាបការិតំ ទស្សេតិ. មជ្ឈន្ហិកេ វីតិវត្តេតិ គិហិសំសគ្គវសេន កាលំ វីតិនាមេន្តោ មជ្ឈន្ហេ ពហុវីតិវត្តេ. អញ្ញេហិ ភិក្ខូហីតិ នាតិកាលំ បវិដ្ឋេហិ. និស្សក្កវចនញ្ចេតំ. ភាយាមិ នាគទត្តន្តិ តស្ស បដិបត្តិំ ភាយិតព្ពំ កត្វា ទេវតា វទន្តី បដិបត្តិយំ និយោជេតិ. សុប្បគព្ភន្តិ កាយបាគព្ពិយាទីហិ អតិវិយ សមន្នាគតំ.

នាគទត្តសុត្តវណ្ណនា និដ្ឋិតា.