១. វិវេកសុត្តវណ្ណនា

២២១. សំវេជេតុកាមាតិ អត្ថតោ សំវេគំ ឧប្បាទេតុកាមា. តថាភូតា នំ កិលេសសង្គណិកាទិតោ វិវេចេតុកាមា នាម ហោតីតិ វុត្តំ ‘‘វិវេកំ បដិបជ្ជាបេតុកាមា’’តិ. ពាហិរេសូតិ គោចរជ្ឈត្តតោ ពហិភូតេសុ. បុថុត្តារម្មណេសូតិ រូបាទិនានារម្មណេសុ. ចរតីតិ បវត្តតិ. ត្វំ ជនោតិ ត្វំ អត្តនោ កិលេសេហិ ជននតោ វិសុំ ជាតោ តាទិសេ ឯវ អញ្ញស្មិំ ជនេ ឥមំ អយោនិសោមនសិការវសេន បវត្តមានំ ឆន្ទរាគំ វិនយស្សុ វិនោទេហិ. សតំ តំ សារយាមសេតិ និយ្យានិកសាសនេ បព្ពជិត្វា សត្ថុ សន្តិកេ កម្មដ្ឋានំ គហេត្វា អរញ្ញវាសេន ច សតិមន្តំ បណ្ឌិតំ តំ មយម្បិ យថាឧប្បន្នំ វិតក្កំ វិនោទនាយ សារយាម, សតំ វា សប្បុរិសានំ កិលេសវិគមនធម្មំ បដិបជ្ជិត្វា វសន្តំ តំ សារយាម វដ្ដទុក្ខំ. បាតាលន្តិ មោហបាតាលំ កិលេសរជោ, តទេវ ‘‘បាតាល’’ន្តិ វុត្តំ. មា អវហរីតិ ហេដ្ឋា ទុគ្គតិសោតំ មា ឧបនេសិ. សិតន្តិ សម្ពន្ធំ. តេនាហ ‘‘សរីរលគ្គ’’ន្តិ. វិវេកមាបន្នោតិ កិលេសវិវេកំ សមថវិបស្សនាភាវនមាបន្នោ. ឧត្តមវីរិយន្តិ ឧស្សោឡ្ហិលក្ខណប្បត្តំ វីរិយំ, ចតុព្ពិធំ សមប្បធានវីរិយំ វា សម្បត្តំ. បគ្គយ្ហាតិ អារោបេត្វា. បរមវិវេកន្តិ បរមំ សមុច្ឆេទវិវេកំ.

វិវេកសុត្តវណ្ណនា និដ្ឋិតា.