៩. សេលាសុត្តវណ្ណនា

១៧០. កេនិទំ បកតំ ពិម្ពន្តិ ឥទំ អត្តភាវសញ្ញិតំ ពិម្ពំ ព្រហ្មា-វិសណុបុរិស-បជាបតិអាទីសុ កេន កតំ និម្មិតំ និព្ពត្តិតន្តិ កត្តព្ពមោហំ នាម កាតុកាមោ បុច្ឆតិ. អឃន្តិ អឃវត្ថុ. តេនាហ ‘‘ទុក្ខបតិដ្ឋានត្តា’’តិ. ហេតុនិរោធេនាតិ តណ្ហាសង្ខតស្ស ហេតុនោ អនុប្បាទនិរោធេន. បច្ចយវេកល្លេនាតិ តទវសិដ្ឋកិលេសាភិសង្ខារាទិបច្ចយស្ស វេកល្លភាវេន, អបច្ចយភាវូបគមនេនាតិ អត្ថោ.

សេលាសុត្តវណ្ណនា និដ្ឋិតា.