៣. កិសាគោតមីសុត្តវណ្ណនា

១៦៤. ‘‘កិសាគោតមី’’តិ ឯត្ថ កា បនាយំ កិសាគោតមី, កិស្ស អយំ ភិក្ខុនី ហុត្វា សមណធម្មំ មត្ថកំ បាបេសីតិ តមត្ថំ វិភាវេតុំ ‘‘បុព្ពេ កិរា’’តិអាទិមារទ្ធំ. អង្គារាវាតិ អទ្ទារិដ្ឋកវណ្ណអង្គារា ឯវ ជាតា. ទារុសាកន្តិ អទ្ធមាសកេន ទារុំ សាកញ្ច អាហរិស្សាមីតិ អន្តរាបណេ អន្តរវីថិំ គតា.

សិទ្ធត្ថកន្តិ សាសបំ. សាលាយន្តិ អនាថសាលាយំ. ខុរគ្គេយេវាតិ ខុរសិខេ ឯវ, កេសោរោហនក្ខណេ ឯវាតិ អត្ថោ.

ឯកមាសីតិ ឯត្ថ ម-ការោ បទសន្ធិករោ. សំហិតាវសេន ច បុរិមបទេ វា រស្សត្តំ. បរបទេ វា ទីឃត្តន្តិ អាហ ‘‘ឯកា អាសី’’តិ. ភាវនបុំសកមេតំ ‘‘ឯកមន្តំ និសីទី’’តិអាទីសុ វិយ. បុត្តមរណំ អន្តំ អតីតំ ឥទានិ បុត្តមរណស្ស អភាវតោ. តេនេវាហ ‘‘បុត្តមរណំ នាម នត្ថី’’តិ. បុរិសំ គវេសិតុន្តិ យថា មយ្ហំ បុរិសគវេសនា នាម សព្ពសោ នត្ថិ, តថា ឯវ បុត្តគវេសនាបិ នត្ថិ, តស្មា មេ បុត្តមរណំ ឯតទន្តំ, សព្ពេសុ ខន្ធាទីសុ ភវាទីសុ ច តណ្ហានន្ទិយា អភាវកថនេន សព្ពសត្តេសុ តណ្ហា សព្ពសោ វិសោសិតា, តស្សាយេវ ការកអវិជ្ជាក្ខន្ធោ បទាលិតោតិ អត្តនោ និក្កិលេសតំ បវេទេន្តី ថេរី សីហនាទំ នទីតិ.

កិសាគោតមីសុត្តវណ្ណនា និដ្ឋិតា.