៣. សម្ពរិមាយាសុត្តវណ្ណនា

២៦៩. អាពាធិកោតិ អាពាធោ អស្ស អត្ថីតិ អាពាធិកោ. វាចេសីតិ សិក្ខាបេសិ. សម្ពរោ នាម អសុរមាយាយ អាទិបុរិសោ បុរាតនោ អសុរិន្ទោ. តំ សន្ធាយាហ ‘‘យថា សម្ពរោ’’តិអាទិ. ឯវំ បច្ចតិ អញ្ញោបិ មាយាវី មាយំ បយោជេត្វា. ឧបវាទន្តរាយោ នាម ខមាបនេ សតិ វិគច្ឆតិ, បាកតិកមេវ ហោតីតិ អាហ ‘‘ឯវមស្ស ផាសុ ភវេយ្យា’’តិ. តេនាតិ វេបចិត្តិនា សម្ពរវិជ្ជាយ អទានេន វញ្ចិតត្តា. តថា អកត្វាតិ ឥសីនំ សន្តិកំ នេត្វា ខមាបនវសេន កាតព្ពំ អកត្វា.

សម្ពរិមាយាសុត្តវណ្ណនា និដ្ឋិតា.