៧. នទុព្ភិយសុត្តវណ្ណនា

២៥៣. សុបច្ចត្ថិកោតិ សុដ្ឋុ អតិវិយ បច្ចត្ថិកោ បដិសត្តុ. គហិតោសីតិ ទេវបាសេន ពន្ធិត្វា គហិតោ អសិ. ពទ្ធោវ អហោសិ សក្កស្ស បុញ្ញានុភាវេន. ចេតិយរាជា កិរ ឥមស្មិំ កប្បេ តតោ បុព្ពេ កេនចិ អវុត្តបុព្ពំ ខរមុសាវាទំ អភាសិ, តាវទេវ វិរជ្ឈិត្វា មហាបថវិយា វិវរេ ទិនេ និបតិត្វា អវីចិអគ្គិជាលានមិន្ទនមហោសិ. តំ សន្ធាយ វុត្តំ ‘‘ចេតិយរញ្ញោ បាបំ សន្ធាយា’’តិ. មហាបាបានីតិ មហន្តានិ គរុតរានិ បាបានិ. តថា ហិ វេបចិត្តិនោ សបថករណេ និទស្សនភាវេន ឯតានិ អដ្ឋកថាយំ អាគតានីតិ.

នទុព្ភិយសុត្តវណ្ណនា និដ្ឋិតា.