៥. បត្តនិទ្ទេសោ

បត្តោ ចាតិ –

៦០. អយោបត្តោ ភូមិបត្តោ, ជាតិយា កប្បិយា ទុវេ;

ឧក្កដ្ឋោ មជ្ឈិមោ ចេវ, ឱមកោ ច បមាណតោ.

៦១. ឧក្កដ្ឋោ មគធេ នាឡិ-ទ្វយតណ្ឌុលសាធិតំ;

គណ្ហាតិ ឱទនំ សូបំ, ព្យញ្ជនញ្ច តទូបិយំ.

៦២. មជ្ឈិមោ តស្សុបឌ្ឍោវ, តតោបឌ្ឍោវ ឱមកោ;

ឧក្កដ្ឋតោ ច ឧក្កដ្ឋោ, អបត្តោ ឱមកោមកោ.

៦៣. អតិរេកបត្តោ ធារេយ្យោ, ទសាហបរមំ សកោ;

កប្បោ និស្សគ្គិយោ ហោតិ, តស្មិំ កាលេតិនាមិតេ.

៦៤. អច្ឆេទទានគាហេហិ, វិព្ភមា មរណុទ្ធដា;

លិង្គសិក្ខាហិ ឆិទ្ទេន, បត្តាធិដ្ឋានមុជ្ឈតិ.

៦៥. បត្តំ ន បដិសាមេយ្យ, សោទកំ ន ច ឱតបេ;

ឧណ្ហេ ន និទហេ ភុម្យា, ន ឋបេ នោ ច លគ្គយេ.

៦៦. មិឌ្ឍន្តេ បរិភណ្ឌន្តេ, អង្កេ វា អាតបត្តកេ;

បាទេសុ មញ្ចបីឋេ វា, ឋបេតុំ ន ច កប្បតិ.

៦៧. ន នីហរេយ្យ ឧច្ឆិដ្ឋោ-ទកញ្ច ចលកដ្ឋិកំ;

បត្តេន បត្តហត្ថោ វា, កវាដំ ន បណាមយេ.

៦៨. ភូមិអាធារកេ ទារុទណ្ឌាធារេ សុសជ្ជិតេ;

ទុវេ បត្តេ ឋបេយ្យេកំ, និក្កុជ្ជិត្វាន ភូមិយំ.

៦៩. ទារុរូបិយសោវណ្ណ-មណិវេឡុរិយាមយា;

កំសកាចតិបុសីសផលិកាតម្ពលោហជា.

៧០. ឆវសីសមយោ ចាបិ, ឃដីតុម្ពកដាហជា;

បត្តា អកប្បិយា សព្ពេ, វុត្តា ទុក្កដវត្ថុកាតិ.