២៨. កម្មនិទ្ទេសោ

កម្មញ្ចាតិ –

១៩៩. វគ្គេន អធម្មកម្មំ, សមគ្គេន អធម្មិកំ;

វគ្គេន ធម្មកម្មញ្ច, សមគ្គេន ច ធម្មិកំ;

ចតុត្ថំយេវានុញ្ញាតំ, សេសកម្មេសុ ទុក្កដំ.

២០០. ចតុវគ្គោ បញ្ចវគ្គោ, ទសវីសតិវគ្គិកោ;

តិរេកវីសតិវគ្គោ, បញ្ច សង្ឃា វិភាវិតា.

២០១. ចតុវគ្គេត្ថ អព្ភានុ-បសម្បទាបវារណា;

បញ្ចវគ្គោ ច អព្ភានំ, មជ្ឈទេសុបសម្បទំ.

២០២. ទសវគ្គោ ច អព្ភានំ, ឋបេត្វា សព្ពកម្មិកោ;

ឥតរោ សព្ពកម្មេសុ, កម្មប្បត្តោតិ ទីបិតោ.

២០៣. ចតុវគ្គេន កត្តព្ពេ, ចត្តារោ បកតត្តកា;

កម្មប្បត្តា បរេ ឆន្ទា-រហា សេសេប្យយំ នយោ.

២០៤. ចតុវគ្គាទិកត្តព្ពំ, អសំវាសកម្មារហ;

គរុកដ្ឋេស្វញ្ញតរំ, កត្វាន គណបូរកំ;

បរិវាសាទិកំ កម្មំ, កតំ កុប្បញ្ច ទុក្កដំ.

២០៥. អធម្មកម្មំ វារេយ្យ, អន្តរាយេ ទុវេ តយោ;

ទិដ្ឋាវិមេកោធិដ្ឋានំ, វារេន្តេវ តតោធិកា.

២០៦. កម្មារហា អសំវាសា, ខិត្តចិត្តទុខដ្ដិតា;

ឯតេសំ សង្ឃមជ្ឈម្ហិ, បដិក្ខេបោ ន រុហតិ.

២០៧. បកតត្តេកសីមដ្ឋ-សមសំវាសភិក្ខុនោ;

អារោចេន្តស្សន្តមសោ-នន្តរស្សាបិ រូហតិ.

២០៨. កោបេតុំ ធម្មិកំ កម្មំ, បដិក្កោសេយ្យ សម្មុខា;

តិរោក្ខា កាយសាមគ្គិំ, ឆន្ទំ នោ ទេយ្យ ទុក្កដន្តិ.