១៧. អាបុច្ឆករណនិទ្ទេសោ

អាបុច្ឆករណន្តិ –

១៦១. អនជ្ឈិដ្ឋោវ ថេរេន, បាតិមោក្ខំ ន ឧទ្ទិសេ;

ធម្មំ ន កថយេ បញ្ហំ, ន បុច្ឆេ ន ច វិស្សជេ.

១៦២. អាបុច្ឆិត្វា កថេន្តស្ស, បុន វុឌ្ឍតរាគមេ;

បុន អាបុច្ឆនំ នត្ថិ, ភត្តគ្គេ ចានុមោទតោ.

១៦៣. វសន្តោ ច អនាបុច្ឆា, វុឌ្ឍេនេកវិហារកេ;

ន សជ្ឈាយេយ្យ ឧទ្ទេសំ, បរិបុច្ឆញ្ច នោ ទទេ.

១៦៤. ធម្មំ ន ភាសយេ ទីបំ, ន ករេ ន ច វិជ្ឈបេ;

វាតបានំ កវាដំ វា, វិវរេយ្យ ថកេយ្យ ច.

១៦៥. ចង្កមេ ចង្កមន្តោបិ, វុឌ្ឍេន បរិវត្តយេ;

យេន វុឌ្ឍោ ស សង្ឃាដិ-កណ្ណេនេនំ ន ឃដ្ដយេតិ.