៣. តតិយបាដិទេសនីយសិក្ខាបទវណ្ណនា

លទ្ធសេក្ខសម្មុតិកានីតិ ញត្តិទុតិយេន កម្មេន លទ្ធសេក្ខសម្មុតិកានិ. យញ្ហិ កុលំ សទ្ធាយ វឌ្ឍតិ, ភោគេន ហាយតិ, ឯវរូបស្ស កុលស្ស ញត្តិទុតិយេន កម្មេន សេក្ខសម្មុតិំ ទេន្តិ, តំ សន្ធាយេតំ វុត្តំ.

ឃរតោ នីហរិត្វាតិ ឃរតោ អាសនសាលំ វា វិហារំ វា អានេត្វា. តេនាហ ‘‘អាសនសាលាទីសុ វា’’តិ. ឥមស្ស ‘‘ទេន្តី’’តិ ឥមិនា សម្ពន្ធោ. ទ្វារមូលេ វា ឋបិតំ ទេន្តីតិ ទ្វារមូលេ ឋបិតំ បច្ឆា សម្បត្តស្ស ទេន្តិ. ភិក្ខុំ បន ទិស្វា អន្តោគេហតោ នីហរិត្វា ទិយ្យមានំ ន វដ្ដតិ. និច្ចភត្តកេតិ និច្ចំ ទាតព្ពភត្តកេ. សលាកភត្តេតិ រុក្ខសារមយាយ សលាកាយ វា វេឡុវិលីវតាលបណ្ណាទិមយាយ បដ្ដិកាយ វា ‘‘អសុកស្ស នាម សលាកភត្ត’’ន្តិ ឯវំ អក្ខរានិ ឧបនិពន្ធិត្វា គាហាបេត្វា ទាតព្ពភត្តេ. បក្ខិកេតិ ឯកស្មិំ បក្ខេ ឯកទិវសេ ទាតព្ពភត្តេ. ឧបោសថិកេតិ ឧបោសថេ ទាតព្ពភត្តេ. បាដិបទិកេតិ បាដិបទទិវសេ ទាតព្ពភត្តេ.

តតិយបាដិទេសនីយសិក្ខាបទវណ្ណនា និដ្ឋិតា.