កង្ខាវិតរណី-អដ្ឋកថា

គន្ថារម្ភកថា

ពុទ្ធំ ធម្មញ្ច សង្ឃញ្ច, វិប្បសន្នេន ចេតសា;

វន្ទិត្វា វន្ទនាមាន, បូជាសក្ការភាជនំ.

ថេរវំសប្បទីបានំ, ថិរានំ វិនយក្កមេ;

បុព្ពាចរិយសីហានំ, នមោ កត្វា កតញ្ជលី.

បាមោក្ខំ អនវជ្ជានំ, ធម្មានំ យំ មហេសិនា;

មុខំ មោក្ខប្បវេសាយ, បាតិមោក្ខំ បកាសិតំ.

សូរតេន និវាតេន, សុចិសល្លេខវុត្តិនា;

វិនយាចារយុត្តេន, សោណត្ថេរេន យាចិតោ.

តត្ថ សញ្ជាតកង្ខានំ, ភិក្ខូនំ តស្ស វណ្ណនំ;

កង្ខាវិតរណត្ថាយ, បរិបុណ្ណវិនិច្ឆយំ.

មហាវិហារវាសីនំ, វាចនាមគ្គនិស្សិតំ;

វត្តយិស្សាមិ នាមេន, កង្ខាវិតរណិំ សុភន្តិ.