៥. និក្កឌ្ឍនសិក្ខាបទវណ្ណនា

បញ្ចមេ ឧបស្សយំ ទត្វាតិ សកវាដពទ្ធំ អត្តនោ បុគ្គលិកវិហារំ ទត្វា. និក្កឌ្ឍេយ្យាតិ ពហូនិបិ ទ្វារានិ ឯកប្បយោគេន និក្កឌ្ឍេន្តិយា ឯកា អាបត្តិ, នានាបយោគេហិ បយោគគណនាយ អាបត្តិយោ, អាណត្តិយម្បិ ឯសេវ នយោ. សចេ បន ‘‘ឥមញ្ចិមញ្ច ទ្វារំ អតិក្កាមេហី’’តិ អាណាបេតិ, ឯកាយ អាណត្តិយា ឯវ ទ្វារគណនាយ អាបត្តិយោ.

សាវត្ថិយំ ថុល្លនន្ទំ អារព្ភ ឯតាទិសេ វត្ថុស្មិំ បញ្ញត្តំ, តិកបាចិត្តិយំ, អកវាដពទ្ធតោ ទុក្កដំ, អនុបសម្បន្នាយ តិកទុក្កដំ, សកវាដពទ្ធតោ វា អកវាដពទ្ធតោ វា ឧភិន្នម្បិ បរិក្ខារនិក្កឌ្ឍនេ ទុក្កដមេវ, សេសំ សង្ឃិកវិហារនិក្កឌ្ឍនសិក្ខាបទេ វុត្តនយមេវាតិ.

និក្កឌ្ឍនសិក្ខាបទវណ្ណនា និដ្ឋិតា.