១១. គរុបាវុរណសិក្ខាបទវណ្ណនា

ទុតិយស្ស បឋមេ គរុបាវុរណន្តិ សីតកាលេ បាវុរណំ. ចតុក្កំសបរមន្តិ កំសោ នាម ចតុក្កហាបណិកោ ហោតិ, តស្មា សោឡសកហាបណគ្ឃនកំ. ចេតាបេតព្ពន្តិ ឋបេត្វា សហធម្មិកេ ច ញាតកប្បវារិតេ ច អញ្ញេន កិស្មិញ្ចិទេវ គុណេ បរិតុដ្ឋេន ‘‘វទេថាយ្យេ, យេនត្ថោ’’តិ វុត្តាយ វិញ្ញាបេតព្ពំ. តតោ ចេ ឧត្តរីតិ តតុត្តរិ វិញ្ញាបេន្តិយា ទុក្កដំ, បដិលទ្ធំ និស្សគ្គិយំ ហោតិ.

សាវត្ថិយំ ថុល្លនន្ទំ អារព្ភ រាជានំ កម្ពលំ វិញ្ញាបនវត្ថុស្មិំ បញ្ញត្តំ, តិកបាចិត្តិយំ, ឩនកចតុក្កំសេ ទ្វិកទុក្កដំ. តស្មិំ បន ឩនកសញ្ញាយ, ចតុក្កំសបរមំ ចេតាបេន្តិយា, ញាតកប្បវារិតេ វា, អញ្ញស្ស វា អត្ថាយ, អត្តនោ វា ធនេន, មហគ្ឃំ ចេតាបេន្តំ អប្បគ្ឃំ ចេតាបេន្តិយា, ឧម្មត្តិកាទីនញ្ច អនាបត្តិ. គរុបាវុរណតា, អតិរេកចតុក្កំសតា, អននុញ្ញាតដ្ឋានេ វិញ្ញត្តិ, បដិលាភោតិ ឥមានេត្ថ ចត្តារិ អង្គានិ. សមុដ្ឋានាទីនិ សញ្ចរិត្តសទិសានីតិ.

គរុបាវុរណសិក្ខាបទវណ្ណនា និដ្ឋិតា.