សាធារណបារាជិកំ

១…បេ…៤. មេថុនធម្មសិក្ខាបទវណ្ណនា

តត្ថ សុណាតុ មេតិអាទីនំ ភិក្ខុបាតិមោក្ខវណ្ណនាយំ វុត្តនយេនេវ អត្ថោ វេទិតព្ពោ. កេវលញ្ហិ, ភន្តេ, អយ្យេតិអាទិវសេន តស្មិញ្ច ឥធ ច អភិលាបមត្តមេវ លិង្គភេទមត្តញ្ច វិសេសោ. យស្មា ច ភិក្ខុនិយា សិក្ខាបច្ចក្ខានំ នាម នត្ថិ, តស្មា ភិក្ខុនីនំ ‘‘សិក្ខាសាជីវសមាបន្នា សិក្ខំ អបច្ចក្ខាយ ទុព្ពល្យំ អនាវិកត្វា’’តិ អវត្វា យា បន ភិក្ខុនី ឆន្ទសោ មេថុនំ ធម្មំ បដិសេវេយ្យាតិ វុត្តំ. តត្ថ ឆន្ទសោតិ មេថុនរាគប្បដិសំយុត្តេន ឆន្ទេន ចេវ រុចិយា ច. ឆន្ទេ បន អសតិ ពលក្ការេន បធំសិតាយ អនាបត្តិ, តស្មា យា បរិបុណ្ណូបសម្បទា ភិក្ខុនី មនុស្សាមនុស្សតិរច្ឆានជាតីសុ បុរិសឧភតោព្យញ្ជនកបណ្ឌកានំ យស្ស កស្សចិ សជីវស្ស វា និជ្ជីវស្ស វា សន្ថតស្ស វា អសន្ថតស្ស វា អក្ខាយិតស្ស វា យេភុយ្យេន អក្ខាយិតស្ស វា អង្គជាតស្ស អត្តនោ វច្ចមគ្គបស្សាវមគ្គមុខេសុ តីសុ យត្ថកត្ថចិ សន្ថតេ វា អសន្ថតេ វា បកតិវាតេន អសំផុដ្ឋេ អល្លោកាសេ អន្តមសោ តិលផលមត្តម្បិ បទេសំ ឆន្ទសោ បវេសេតិ, បរេន វា បវេសិយមានា បវេសនបវិដ្ឋដ្ឋិតឧទ្ធរណេសុ យំកិញ្ចិ សាទិយតិ, អយំ បារាជិកា ហោតិ. សេសមេត្ថ ឥតោ បរេសុ ច សាធារណសិក្ខាបទេសុ វុត្តនយានុសារេនេវ វេទិតព្ពំ.