៥៦. សសិត្ថកសិក្ខាបទវណ្ណនា

តិំសតិមេ ‘‘ឧទ្ធរិត្វា វា ភិន្ទិត្វា វា បដិគ្គហេ វា នីហរិត្វា វា ឆឌ្ឌេតី’’តិ ឥទំ អនាបត្តិយំ អធិកំ. តត្ថ ឧទ្ធរិត្វា វាតិ សិត្ថានិ ឧទកតោ ឧទ្ធរិត្វា, ឯកស្មិំ ឋានេ រាសិំ កត្វា ឧទកំ ឆឌ្ឌេតិ. ភិន្ទិត្វា វាតិ សិត្ថានិ ភិន្ទិត្វា ឧទកគតិកានិ កត្វា ឆឌ្ឌេតិ. បដិគ្គហេ វាតិ បដិគ្គហេន បដិច្ឆន្តានំ បដិគ្គហេ ឆឌ្ឌេតិ. នីហរិត្វាតិ ពហិ នីហរិត្វា ឆឌ្ឌេតិ, ឯវំ ឆឌ្ឌេន្តស្ស អនាបត្តិ.

តិំសភោជនប្បដិសំយុត្តសិក្ខាបទវណ្ណនា និដ្ឋិតា.