១៣-១៤. ឧច្ចសទ្ទសិក្ខាបទវណ្ណនា

តេរសមេ អប្បសទ្ទោតិ ន ឧច្ចាសទ្ទមហាសទ្ទោ ហុត្វា. ចុទ្ទសមេបិ ឯសេវ នយោ. អយំ បនេត្ថ អប្បសទ្ទតាបរិច្ឆេទោ – សចេ ទ្វាទសហត្ថេ គេហេ អាទិម្ហិ សង្ឃត្ថេរោ, មជ្ឈេ ទុតិយត្ថេរោ, អន្តេ តតិយត្ថេរោតិ ឯវំ និសិន្នេសុ យំ សង្ឃត្ថេរោ ទុតិយត្ថេរេន សទ្ធិំ មន្តេតិ, ទុតិយត្ថេរោ ច តស្ស សទ្ទំ សុណាតិ, កថញ្ច វវត្ថបេតិ. តតិយត្ថេរោ បន សទ្ទមេវ សុណាតិ, កថំ ន វវត្ថបេតិ, ឯត្តាវតា អប្បសទ្ទោ ហោតិ. សចេ បន តតិយត្ថេរោ កថញ្ច វវត្ថបេតិ, មហាសទ្ទោ នាម ហោតិ.

១៥…បេ…២០. កាយប្បចាលកាទិសិក្ខាបទវណ្ណនា

ឥតោ បរេសុ ឆសុ កាយប្បចាលកន្តិ កាយំ ចាលេត្វា ចាលេត្វា, ឯស នយោ សព្ពត្ថ. តស្មា កាយាទីនិ បគ្គហេត្វា និច្ចលានិ ឧជុកានិ ឋបេត្វា គន្តព្ពញ្ចេវ និសីទិតព្ពញ្ច, និសីទនប្បដិសំយុត្តេសុ តីសុ វាសូបគតស្ស អនាបត្តិ.