សមារោបនហារវណ្ណនា

អាឃាតាទីនំ អករណីយតាវចនេន ខន្តិសម្បទា ទស្សិតា ហោតិ. ‘‘អប្បមត្តកំ ខោ បនេត’’ន្តិអាទិនា សោរច្ចសម្បទា, ‘‘អត្ថិ ភិក្ខវេ’’តិអាទិនា ញាណសម្បទា, ‘‘អបរាមសតោ ចស្ស បច្ចត្តញ្ញេវ និព្ពុតិ វិទិតា’’តិ, ‘‘វេទនានំ…បេ… យថាភូតំ វិទិត្វា អនុបាទាវិមុត្តោ’’តិ ឯតេហិ សមាធិសម្បទាយ សទ្ធិំ វិជ្ជាវិមុត្តិវសីភាវសម្បទា ទស្សិតា ហោតិ. តត្ថ ខន្តិសម្បទា បដិសង្ខានពលសិទ្ធិតោ សោរច្ចសម្បទាយ បទដ្ឋានំ. សោរច្ចសម្បទា បន អត្ថតោ សីលមេវ, តថា បាណាតិបាតាទីហិ បដិវិរតិវចនំ សីលស្ស បរិយាយវិភាគទស្សនត្ថំ. តត្ថ សីលំ សមាធិស្ស បទដ្ឋានំ, សមាធិ បញ្ញាយ បទដ្ឋានំ. តេសុ សីលេន វីតិក្កមប្បហានំ ទុច្ចរិតសំកិលេសប្បហានញ្ច សិជ្ឈតិ, សមាធិនា បរិយុដ្ឋានប្បហានំ, វិក្ខម្ភនប្បហានំ, តណ្ហាសំកិលេសប្បហានញ្ច សិជ្ឈតិ. បញ្ញាយ ទិដ្ឋិសំកិលេសប្បហានំ, សមុច្ឆេទប្បហានំ, អនុសយប្បហានញ្ច សិជ្ឈតីតិ សីលាទីហិ តីហិ ធម្មក្ខន្ធេហិ សមថវិបស្សនាភាវនាបារិបូរី, បហានត្តយសិទ្ធិ ចាតិ អយំ សមារោបនោ ហារោ.

សោឡសហារវណ្ណនា និដ្ឋិតា.