វិចយហារវណ្ណនា

កប្បនាភាវេបិ វោហារវសេន, អនុវាទវសេន ច ‘‘មម’’ន្តិ វុត្តំ, និយមាភាវតោ វិកប្បនត្ថំ វាគ្គហណំ កតំ, គុណសមង្គិតាយ, អភិមុខីករណាយ ច ‘‘ភិក្ខវេ’’តិ អាមន្តនំ. អញ្ញភាវតោ, បដិវិរុទ្ធភាវតោ ច ‘‘បរេ’’តិ វុត្តំ, វណ្ណបដិបក្ខតោ, អវណ្ណនីយតោ ច ‘‘អវណ្ណ’’ន្តិ វុត្តំ. ព្យត្តិវសេន, វិត្ថារវសេន ច ‘‘ភាសេយ្យុ’’ន្តិ វុត្តំ, ធារណភាវតោ, អធម្មបដិបក្ខតោ ច ‘‘ធម្មស្សា’’តិ វុត្តំ, ទិដ្ឋិសីលេហិ សំហតភាវតោ, កិលេសានំ សង្ឃាតករណតោ ច ‘‘សង្ឃស្សា’’តិ វុត្តំ. វុត្តបដិនិទ្ទេសតោ, វចនុបន្យាសនតោ ច ‘‘តត្រា’’តិ វុត្តំ, សម្មុខភាវតោ, បុថុភាវតោ ច ‘‘តុម្ហេហី’’តិ វុត្តំ. ចិត្តស្ស ហននតោ, អារម្មណាភិឃាតតោ ច ‘‘អាឃាតោ’’តិ វុត្តំ, អារម្មណេ សង្កោចវុត្តិយា, អតុដ្ឋាការតាយ ច ‘‘អប្បច្ចយោ’’តិ វុត្តំ, អារម្មណចិន្តនតោ, និស្សយតោ ច ‘‘ចេតសោ’’តិ វុត្តំ, អត្ថាសាធនតោ, អនុ អនុ ‘‘អនត្ថសាធនតោ’’ ច ‘‘អនភិរទ្ធី’’តិ វុត្តំ, ការណានរហត្តា, សត្ថុសាសនេ ឋិតេហិ កាតុំ អសក្កុណេយ្យត្តា ច ‘‘ន ករណីយា’’តិ វុត្តន្តិ. ឥមិនា នយេន សព្ពបទេសុ វិនិច្ឆយោ កាតព្ពោ. ឥតិ អនុបទវិចយតោ វិចយោ ហារោ អតិវិត្ថារភយេន, សក្កា ច អដ្ឋកថំ តស្សា លីនត្ថវណ្ណនញ្ច អនុគន្ត្វា អយមត្ថោ វិញ្ញុនា វិភាវេតុន្តិ ន វិត្ថារយិម្ហ.