៤. ចតុក្កនិទ្ទេសវណ្ណនា

៩៣៩. ឯវំ-សទ្ទេនាតិ និទស្សនត្ថេន ឯវំ-សទ្ទេនាតិ អធិប្បាយោ. ភវោ ឯវ អភិវុទ្ធោ អភវោ យថា ‘‘អសេក្ខា ធម្មា’’តិ (ធ. ស. តិកមាតិកា ១១). ទុតិយស្មិំ បក្ខេ ភវាភវសទ្ទេន សម្បត្តិវិបត្តិយោ, វុទ្ធិហានិយោ វា វុត្តាតិ វេទិតព្ពា.

អគតិយាតិ អយុត្តគតិយា, អប្បតិរូបកិរិយាយាតិ អត្ថោ.

កោធូបាយាស…បេ… មាតុគាមា វា ឩមិអាទិភយន្តិ យោជនា. បញ្ចកាមគុណមាតុគាមគ្គហណេតិ បញ្ចកាមគុណគ្គហណេ, មាតុគាមគ្គហណេ ច.

‘‘សយំកតំ សុខទុក្ខ’’ន្តិអាទិកា ទិដ្ឋិ យទិបិ អញ្ញេសម្បិ ទិដ្ឋិគតិកានំ អត្ថេវ, តិម្ពរុកោ បន តថាទិដ្ឋិកោ ភគវន្តំ ឧបសង្កមិត្វា បុច្ឆីតិ សា ទិដ្ឋិ ‘‘តិម្ពរុកទិដ្ឋី’’តិ (សំ. និ. ២.១៨) វុត្តា. តេនាហ ‘‘តិម្ពរុកោ…បេ… អាគតត្តា’’តិ.

ចតុក្កនិទ្ទេសវណ្ណនា និដ្ឋិតា.