៤-៥. សត្តាវាសសុត្តាទិវណ្ណនា

២៤-២៥. ចតុត្ថេ សត្តា អាវសន្តិ ឯតេសូតិ សត្តាវាសា, នានត្តសញ្ញិអាទិភេទា សត្តនិកាយា. យស្មា តេ តេ សត្តនិវាសា តប្បរិយាបន្នានំ សត្តានំ តាយ ឯវ តប្បរិយាបន្នតាយ អាធារោ វិយ វត្តព្ពតំ អរហន្តិ. សមុទាយាចារោ ហិ អវយវស្ស យថា ‘‘រុក្ខេ សាខា’’តិ, តស្មា ‘‘សត្តានំ អាវាសា, វសនដ្ឋានានីតិ អត្ថោ’’តិ វុត្តំ. សុទ្ធាវាសាបិ សត្តាវាសោវ ‘‘ន សោ, ភិក្ខវេ, សត្តាវាសោ សុលភរូបោ, យោ មយា អនាវុត្ថបុព្ពោ ឥមិនា ទីឃេន អទ្ធុនា អញ្ញត្រ សុទ្ធាវាសេហិ ទេវេហី’’តិ (ទី. និ. ២.៩១) វចនតោ. យទិ ឯវំ តេ កស្មា ឥធ ន គហិតាតិ តត្ថ ការណមាហ ‘‘អសព្ពកាលិកត្តា’’តិអាទិ. វេហប្ផលា បន ចតុត្ថេយេវ សត្តាវាសេ ភជន្តីតិ ទដ្ឋព្ពំ. បញ្ចមំ ឧត្តានមេវ.

សត្តាវាសសុត្តាទិវណ្ណនា និដ្ឋិតា.