១. សីហនាទសុត្តវណ្ណនា

១១. ទុតិយស្ស បឋមេ អវាបុរេន្តិ វិវរន្តិ ទ្វារំ ឯតេនាតិ អវាបុរណំ. រជំ ហរន្តិ ឯតេនាតិ រជោហរណំ. កឡោបិហត្ថោតិ វិលីវមយភាជនហត្ថោ, ‘‘ចម្មមយភាជនហត្ថោ’’តិ ច វទន្តិ. ឆិន្នានិ វិសាណានិ ឯតស្សាតិ ឆិន្នវិសាណោ, ឧសភោ ច សោ ឆិន្នវិសាណោ ចាតិ ឧសភឆិន្នវិសាណោ. វិសេសនបរោយំ សមាសោ. អហិកុណបេន វាតិអាទិ អតិជេគុច្ឆប្បដិកូលកុណបទស្សនត្ថំ វុត្តំ. កណ្ឋេ អាសត្តេនាតិ កេនចិទេវ បច្ចត្ថិកេន អានេត្វា កណ្ឋេ ពទ្ធេន, ឱមុក្កេនាតិ អត្ថោ. អដ្ដោ អាតុរោ ទុគ្គន្ធបីឡាយ បីឡិតោ. អច្ចយស្ស បដិគ្គណ្ហនំ វា អធិវាសនំ. ឯវញ្ហិ សោ ការណេ ទេសិយមានេ តតោ វិគតោ នាម ហោតិ. តេនាហ ‘‘បដិគ្គណ្ហតូតិ ខមតូ’’តិ. សេសមេត្ថ សុវិញ្ញេយ្យមេវ.

សីហនាទសុត្តវណ្ណនា និដ្ឋិតា.