៧-៨. សប្បុរិសទានសុត្តាទិវណ្ណនា

៣៧-៣៨. សត្តមេ វិចេយ្យ ទេតីតិ ឯត្ថ ទ្វេ វិចិននានិ ទក្ខិណេយ្យវិចិននំ, ទក្ខិណាវិចិននញ្ច. តេសុ វិបន្នសីលេ ឥតោ ពហិទ្ធា បញ្ចនវុតិ បាសណ្ឌភេទេ ច ទក្ខិណេយ្យេ បហាយ សីលាទិគុណសម្បន្នានំ សាសនេ បព្ពជិតានំ ទានំ ទក្ខិណេយ្យវិចិននំ នាម. លាមកលាមកេ បច្ចយេ អបនេត្វា បណីតបណីតេ វិចិនិត្វា តេសំ ទានំ ទក្ខិណាវិចិននំ នាម. តេនាហ ‘‘ឥមស្ស ទិន្នំ មហប្ផលំ ភវិស្សតី’’តិអាទិ. អដ្ឋមេ នត្ថិ វត្តព្ពំ.

សប្បុរិសទានសុត្តាទិវណ្ណនា និដ្ឋិតា.