៨. អរហត្តវគ្គោ

១-៣. ទុក្ខសុត្តាទិវណ្ណនា

៧៥-៧៧. អដ្ឋមស្ស បឋមាទីសុ នត្ថិ វត្តព្ពំ. តតិយេ តិវិធំ កុហនវត្ថុន្តិ បច្ចយប្បដិសេវនសាមន្តជប្បនឥរិយាបថប្បវត្តនសង្ខាតំ តិវិធំ កុហនវត្ថុំ. ឧក្ខិបិត្វាតិ ‘‘មហាកុដុម្ពិកោ មហានាវិកោ មហាទានបតី’’តិអាទិនា បគ្គណ្ហិត្វា លបនំ. អវក្ខិបិត្វាតិ ‘‘កិំ ឥមស្ស ជីវិតំ, ពីជភោជនោ នាមាយ’’ន្តិ ហីឡេត្វា លបនំ.

ទុក្ខសុត្តាទិវណ្ណនា និដ្ឋិតា.

៤. សុខសោមនស្សសុត្តវណ្ណនា

៧៨. ចតុត្ថេ យថាវុត្តធម្មាទីសុ តស្ស កិលេសនិមិត្តំ ទុក្ខំ អនវស្សនន្តិ ‘‘សុខសោមនស្សពហុលោ វិហរតី’’តិ វុត្តំ. កាយិកសុខញ្ចេវ ចេតសិកសោមនស្សញ្ច ពហុលំ អស្សាតិ សុខសោមនស្សពហុលោ. យវតិ តេន ផលំ មិស្សិតំ វិយ ហោតីតិ យោនិ, ឯកន្តិកំ ការណំ. អស្សាតិ យថាវុត្តស្ស ភិក្ខុនោ. បរិបុណ្ណន្តិ អវិកលំ អនវសេសំ.

សុខសោមនស្សសុត្តវណ្ណនា និដ្ឋិតា.

៥. អធិគមសុត្តវណ្ណនា

៧៩. បញ្ចមេ អាគច្ឆន្តិ ឯតេន កុសលា វា អកុសលា វាតិ អាគមនំ, កុសលាកុសលានំ ឧប្បត្តិការណំ. តត្ថ កុសលោតិ អាគមនកុសលោ. ឯវំ ធម្មេ មនសិករោតោ កុសលា វា អកុសលា វា ធម្មា អភិវឌ្ឍន្តីតិ ឯវំ ជានន្តោ. អបគច្ឆន្តិ កុសលា វា អកុសលា វា ឯតេនាតិ អបគមនំ. តេសំ ឯវ អនុប្បត្តិការណំ, តត្ថ កុសលោតិ អបគមនកុសលោ. ឯវំ ធម្មេ មនសិករោតោ កុសលា វា អកុសលា វា ធម្មា នាភិវឌ្ឍន្តីតិ ឯវំ ជានន្តោ. ឧបាយកុសលោតិ ឋានុប្បត្តិកបញ្ញាសមន្នាគតោ. ឥទញ្ច អច្ចាយិកកិច្ចេ វា ភយេ វា ឧប្បន្នេ តស្ស តិកិច្ឆនត្ថំ ឋានុប្បត្តិយា ការណជាននវសេន វេទិតព្ពំ.

អធិគមសុត្តវណ្ណនា និដ្ឋិតា.

៦-៧. មហន្តត្តសុត្តាទិវណ្ណនា

៨០-៨១. ឆដ្ឋេ សម្បត្តេតិ កិលេសេ សម្បត្តេ. សត្តមំ ឧត្តានមេវ.

មហន្តត្តសុត្តាទិវណ្ណនា និដ្ឋិតា.

៨-១០. ទុតិយនិរយសុត្តាទិវណ្ណនា

៨២-៨៤. អដ្ឋមេ កាយបាគព្ភិយាទីហីតិ អាទិ-សទ្ទេន វចីបាគព្ភិយំ មនោបាគព្ភិយញ្ច សង្គណ្ហាតិ. នវមាទីនិ ឧត្តានត្ថានេវ.

ទុតិយនិរយសុត្តាទិវណ្ណនា និដ្ឋិតា.

អរហត្តវគ្គវណ្ណនា និដ្ឋិតា.