១-៥. សញ្ញាសុត្តាទិវណ្ណនា

៦១-៦៥. ទុតិយស្ស បឋមេ ‘‘មហប្ផលា មហានិសំសា’’តិ ឧភយម្បេតំ អត្ថតោ ឯកំ, ព្យញ្ជនមេវ នានន្តិ អាហ ‘‘មហប្ផលា’’តិអាទិ. ‘‘បញ្ចិមេ គហបតយោ អានិសំសា’’តិអាទីសុ (ឧទា. ៧៦) អានិសំស-សទ្ទោ ផលបរិយាយោបិ ហោតិ. មហតោ លោកុត្តរស្ស សុខស្ស បច្ចយា ហោន្តីតិ មហានិសំសា. អមតោគធាតិ អមតព្ភន្តរា អមតំ អនុប្បវិដ្ឋា និព្ពានទិដ្ឋត្តា, តតោ បរំ ន គច្ឆន្តិ. តេន វុត្តំ ‘‘អមតបរិយោសានា’’តិ. អមតំ បរិយោសានំ អវសានំ ឯតាសន្តិ អមតបរិយោសានា. មរណសញ្ញាតិ មរណានុបស្សនាញាណេន សញ្ញា. អាហារេ បដិកូលសញ្ញាតិ អាហារំ គមនាទិវសេន បដិកូលតោ បរិគ្គណ្ហន្តស្ស ឧប្បន្នសញ្ញា. ឧក្កណ្ឋិតស្សាតិ និព្ពិន្ទន្តស្ស កត្ថចិបិ អសជ្ជន្តស្ស. ទុតិយាទីនិ ឧត្តានត្ថានេវ.

សញ្ញាសុត្តាទិវណ្ណនា និដ្ឋិតា.