៧-៩. ចោទនាសុត្តាទិវណ្ណនា

១៦៧-៩. សត្តមេ វត្ថុសន្ទស្សនាតិ យស្មិំ វត្ថុស្មិំ អាបត្តិ, តស្ស សរូបតោ ទស្សនំ. អាបត្តិសន្ទស្សនាតិ យំ អាបត្តិំ សោ អាបន្នោ, តស្សា ទស្សនំ. សំវាសប្បដិក្ខេបោតិ ឧបោសថប្បវារណាទិសំវាសស្ស បដិក្ខិបនំ អករណំ. សាមីចិប្បដិក្ខេបោតិ អភិវាទនាទិសាមីចិកិរិយាយ អករណំ. ចោទយមានេនាតិ ចោទេន្តេន. ចុទិតកស្ស កាលោតិ ចុទិតកស្ស ចោទេតព្ពកាលោ. បុគ្គលន្តិ ចោទេតព្ពបុគ្គលំ. ឧបបរិក្ខិត្វាតិ ‘‘អយំ ចុទិតកលក្ខណេ តិដ្ឋតិ, ន តិដ្ឋតី’’តិ វីមំសិត្វា. អយសំ អារោបេតីតិ ‘‘ឥមេ មំ អភូតេន អព្ភាចិក្ខន្តា អយសំ ព្យសនំ ឧប្បាទេន្តី’’តិ ភិក្ខូនំ អយសំ ឧប្បាទេតិ. អដ្ឋមនវមានិ ឧត្តានត្ថានេវ.

ចោទនាសុត្តាទិវណ្ណនា និដ្ឋិតា.