២-៤. អធិវុត្តិបទសុត្តាទិវណ្ណនា

២២-២៤. ទុតិយេ អធិវចនបទានន្តិ បញ្ញត្តិបទានំ. ទាសាទីសុ សិរិវឌ្ឍកាទិសទ្ទា វិយ វចនមត្តមេវ អធិការំ កត្វា បវត្តិយា អធិវចនំ បញ្ញត្តិ. អថ វា អធិសទ្ទោ ឧបរិភាគេ. វុច្ចតីតិ វចនំ, ឧបរិ វចនំ អធិវចនំ, ឧបាទាភូតរូបាទីនំ ឧបរិ បញ្ញបិយមានា ឧបាទាបញ្ញត្តីតិ អត្ថោ, តស្មា បញ្ញត្តិទីបកបទានីតិ អត្ថោ ទដ្ឋព្ពោ. តស្ស បទានិ បទដ្ឋានានិ អធិវចនបទានិ. តេនាហ ‘‘តេសំ យេ’’តិអាទិ. តេសន្តិ អធិវចនានំ. យេតិ ខន្ធាទយោ. អធិវុត្តិតាយ អធិវុត្តិយោតិ ទិដ្ឋិយោ វុច្ចន្តិ. អធិកញ្ហិ សភាវធម្មេសុ សស្សតាទិំ, បកតិអាទិំ, ទ្រព្យាទិំ, ជីវាទិំ, កាយាទិញ្ច, អភូតំ អត្ថំ អជ្ឈារោបេត្វា ទិដ្ឋិយោ បវត្តន្តីតិ. តេនាហ ‘‘អថ វា’’តិអាទិ. តតិយចតុត្ថានិ សុវិញ្ញេយ្យានិ.

អធិវុត្តិបទសុត្តាទិវណ្ណនា និដ្ឋិតា.