៣. បកិណ្ណកបរិច្ឆេទោ

១. សម្បយុត្តា យថាយោគំ, តេបញ្ញាស សភាវតោ.

ចិត្តចេតសិកា ធម្មា, តេសំ ទានិ យថារហំ.

២. វេទនាហេតុតោ កិច្ចទ្វារាលម្ពណវត្ថុតោ.

ចិត្តុប្បាទវសេនេវ, សង្គហោ នាម នីយតេ.

វេទនាសង្គហោ

៣. តត្ថ វេទនាសង្គហេ តាវ តិវិធា វេទនា សុខំ ទុក្ខំ អទុក្ខមសុខា ចេតិ, សុខំ ទុក្ខំ សោមនស្សំ ទោមនស្សំ ឧបេក្ខាតិ ច ភេទេន បន បញ្ចធា ហោតិ.

៤. តត្ថ សុខសហគតំ កុសលវិបាកំ កាយវិញ្ញាណមេកមេវ, តថា ទុក្ខសហគតំ អកុសលវិបាកំ.

៥. សោមនស្សសហគតចិត្តានិ បន លោភមូលានិ ចត្តារិ, ទ្វាទស កាមាវចរសោភនានិ, សុខសន្តីរណហសនានិ ច ទ្វេតិ អដ្ឋារស កាមាវចរសោមនស្សសហគតចិត្តានិ ចេវ បឋមទុតិយតតិយចតុត្ថជ្ឈានសង្ខាតានិ ចតុចត្តាលីស មហគ្គតលោកុត្តរចិត្តានិ ចេតិ ទ្វាសដ្ឋិវិធានិ ភវន្តិ.

៦. ទោមនស្សសហគតចិត្តានិ បន ទ្វេ បដិឃសម្បយុត្តចិត្តានេវ.

៧. សេសានិ សព្ពានិបិ បញ្ចបញ្ញាស ឧបេក្ខាសហគតចិត្តានេវាតិ.

៨. សុខំ ទុក្ខមុបេក្ខាតិ, តិវិធា តត្ថ វេទនា.

សោមនស្សំ ទោមនស្សមិតិភេទេន បញ្ចធា.

៩. សុខមេកត្ថ ទុក្ខញ្ច, ទោមនស្សំ ទ្វយេ ឋិតំ.

ទ្វាសដ្ឋីសុ សោមនស្សំ, បញ្ចបញ្ញាសកេតរា.

ហេតុសង្គហោ

១០. ហេតុសង្គហេ ហេតូ នាម លោភោ ទោសោ មោហោ អលោភោ អទោសោ អមោហោ ចាតិ ឆព្ពិធា ភវន្តិ.

១១. តត្ថ បញ្ចទ្វារាវជ្ជនទ្វិបញ្ចវិញ្ញាណសម្បដិច្ឆនសន្តីរណវោដ្ឋព្ពនហសនវសេន អហេតុកចិត្តានិ នាម.

១២. សេសានិ សព្ពានិបិ ឯកសត្តតិ ចិត្តានិ សហេតុកានេវ.

១៣. តត្ថាបិ ទ្វេ មោមូហចិត្តានិ ឯកហេតុកានិ.

១៤. សេសានិ ទស អកុសលចិត្តានិ ចេវ ញាណវិប្បយុត្តានិ ទ្វាទស កាមាវចរសោភនានិ ចេតិ ទ្វាវីសតិ ទ្វិហេតុកចិត្តានិ.

១៥. ទ្វាទស ញាណសម្បយុត្តកាមាវចរសោភនានិ ចេវ បញ្ចតិំស មហគ្គតលោកុត្តរចិត្តានិ ចេតិ សត្តចត្តាលីស តិហេតុកចិត្តានីតិ.

១៦. លោភោ ទោសោ ច មោហោ ច,

ហេតូ អកុសលា តយោ;

អលោភាទោសាមោហោ ច,

កុសលាព្យាកតា តថា.

១៧. អហេតុកាដ្ឋារសេកហេតុកា ទ្វេ ទ្វាវីសតិ.

ទ្វិហេតុកា មតា សត្តចត្តាលីសតិហេតុកា.

កិច្ចសង្គហោ

១៨. កិច្ចសង្គហេ កិច្ចានិ នាម បដិសន្ធិភវង្គាវជ្ជនទស្សនសវនឃាយនសាយនផុសនសម្បដិច្ឆនសន្តីរណវោដ្ឋព្ពនជវនតទារម្មណចុតិវសេន ចុទ្ទសវិធានិ ភវន្តិ.

១៩. បដិសន្ធិភវង្គាវជ្ជនបញ្ចវិញ្ញាណឋានាទិវសេន បន តេសំ ទសធា ឋានភេទោ វេទិតព្ពោ.

២០. តត្ថ ទ្វេ ឧបេក្ខាសហគតសន្តីរណានិ ចេវ អដ្ឋ មហាវិបាកានិ ច នវ រូបារូបវិបាកានិ ចេតិ ឯកូនវីសតិ ចិត្តានិ បដិសន្ធិភវង្គចុតិកិច្ចានិ នាម.

២១. អាវជ្ជនកិច្ចានិ បន ទ្វេ.

២២. តថា ទស្សនសវនឃាយនសាយនផុសនសម្បដិច្ឆនកិច្ចានិ ច.

២៣. តីណិ សន្តីរណកិច្ចានិ.

២៤. មនោទ្វារាវជ្ជនមេវ បញ្ចទ្វារេ វោដ្ឋព្ពនកិច្ចំ សាធេតិ.

២៥. អាវជ្ជនទ្វយវជ្ជិតានិ កុសលាកុសលផលកិរិយចិត្តានិ បញ្ចបញ្ញាស ជវនកិច្ចានិ.

២៦. អដ្ឋ មហាវិបាកានិ ចេវ សន្តីរណត្តយញ្ចេតិ ឯកាទស តទារម្មណកិច្ចានិ.

២៧. តេសុ បន ទ្វេ ឧបេក្ខាសហគតសន្តីរណចិត្តានិ បដិសន្ធិភវង្គចុតិតទារម្មណសន្តីរណវសេន បញ្ចកិច្ចានិ នាម.

២៨. មហាវិបាកានិ អដ្ឋ បដិសន្ធិភវង្គចុតិតទារម្មណវសេន ចតុកិច្ចានិ នាម.

២៩. មហគ្គតវិបាកានិ នវ បដិសន្ធិភវង្គចុតិវសេន តិកិច្ចានិ នាម.

៣០. សោមនស្សសន្តីរណំ សន្តីរណតទារម្មណវសេន ទុកិច្ចំ.

៣១. តថា វោដ្ឋព្ពនំ វោដ្ឋព្ពនាវជ្ជនវសេន.

៣២. សេសានិ បន សព្ពានិបិ ជវនមនោធាតុត្តិកទ្វិបញ្ចវិញ្ញាណានិ យថាសម្ភវមេកកិច្ចានីតិ.

៣៣. បដិសន្ធាទយោ នាម, កិច្ចភេទេន ចុទ្ទស.

ទសធា ឋានភេទេន, ចិត្តុប្បាទា បកាសិតា.

៣៤. អដ្ឋសដ្ឋិ តថា ទ្វេ ច, នវាដ្ឋ ទ្វេ យថាក្កមំ.

ឯកទ្វិតិចតុបញ្ចកិច្ចឋានានិ និទ្ទិសេ.

ទ្វារសង្គហោ

៣៥. ទ្វារសង្គហេ ទ្វារានិ នាម ចក្ខុទ្វារំ សោតទ្វារំ ឃានទ្វារំ ជិវ្ហាទ្វារំ កាយទ្វារំ មនោទ្វារញ្ចេតិ ឆព្ពិធានិ ភវន្តិ.

៣៦. តត្ថ ចក្ខុមេវ ចក្ខុទ្វារំ.

៣៧. តថា សោតាទយោ សោតទ្វារាទីនិ.

៣៨. មនោទ្វារំ បន ភវង្គន្តិ បវុច្ចតិ.

៣៩. តត្ថ បញ្ចទ្វារាវជ្ជនចក្ខុវិញ្ញាណសម្បដិច្ឆនសន្តីរណវោដ្ឋព្ពនកាមាវចរជវនតទារម្មណវសេន ឆចត្តាលីស ចិត្តានិ ចក្ខុទ្វារេ យថារហំ ឧប្បជ្ជន្តិ, តថា បញ្ចទ្វារាវជ្ជនសោតវិញ្ញាណាទិវសេន សោតទ្វារាទីសុបិ ឆចត្តាលីសេវ ភវន្តីតិ សព្ពថាបិ បញ្ចទ្វារេ ចតុបញ្ញាស ចិត្តានិ កាមាវចរានេវ.

៤០. មនោទ្វារេ បន មនោទ្វារាវជ្ជនបញ្ចបញ្ញាសជវនតទារម្មណវសេន សត្តសដ្ឋិ ចិត្តានិ ភវន្តិ.

៤១. ឯកូនវីសតិ បដិសន្ធិភវង្គចុតិវសេន ទ្វារវិមុត្តានិ.

៤២. តេសុ បន បញ្ចវិញ្ញាណានិ ចេវ មហគ្គតលោកុត្តរជវនានិ ចេតិ ឆត្តិំស យថារហមេកទ្វារិកចិត្តានិ នាម.

៤៣. មនោធាតុត្តិកំ បន បញ្ចទ្វារិកំ.

៤៤. សុខសន្តីរណវោដ្ឋព្ពនកាមាវចរជវនានិ ឆទ្វារិកចិត្តានិ.

៤៥. ឧបេក្ខាសហគតសន្តីរណមហាវិបាកានិ ឆទ្វារិកានិ ចេវ ទ្វារវិមុត្តានិ ច.

៤៦. មហគ្គតវិបាកានិ ទ្វារវិមុត្តានេវាតិ.

៤៧. ឯកទ្វារិកចិត្តានិ, បញ្ចឆទ្វារិកានិ ច.

ឆទ្វារិកវិមុត្តានិ, វិមុត្តានិ ច សព្ពថា.

ឆត្តិំសតិ តថា តីណិ, ឯកតិំស យថាក្កមំ;

ទសធា នវធា ចេតិ, បញ្ចធា បរិទីបយេ.

អាលម្ពណសង្គហោ

៤៨. អាលម្ពណសង្គហេ អារម្មណានិ នាម រូបារម្មណំ សទ្ទារម្មណំ គន្ធារម្មណំ រសារម្មណំ ផោដ្ឋព្ពារម្មណំ ធម្មារម្មណញ្ចេតិ ឆព្ពិធានិ ភវន្តិ.

៤៩. តត្ថ រូបមេវ រូបារម្មណំ, តថា សទ្ទាទយោ សទ្ទារម្មណាទីនិ.

៥០. ធម្មារម្មណំ បន បសាទសុខុមរូបចិត្តចេតសិកនិព្ពានបញ្ញត្តិវសេន ឆធា សង្គយ្ហតិ.

៥១. តត្ថ ចក្ខុទ្វារិកចិត្តានំ សព្ពេសម្បិ រូបមេវ អារម្មណំ, តញ្ច បច្ចុប្បន្នំ. តថា សោតទ្វារិកចិត្តាទីនម្បិ សទ្ទាទីនិ, តានិ ច បច្ចុប្បន្នានិយេវ.

៥២. មនោទ្វារិកចិត្តានំ បន ឆព្ពិធម្បិ បច្ចុប្បន្នមតីតំ អនាគតំ កាលវិមុត្តញ្ច យថារហមារម្មណំ ហោតិ.

៥៣. ទ្វារវិមុត្តានញ្ច បដិសន្ធិភវង្គចុតិសង្ខាតានំ ឆព្ពិធម្បិ យថាសម្ភវំ យេភុយ្យេន ភវន្តរេ ឆទ្វារគ្គហិតំ បច្ចុប្បន្នមតីតំ បញ្ញត្តិភូតំ វា កម្មកម្មនិមិត្តគតិនិមិត្តសម្មតំ អារម្មណំ ហោតិ.

៥៤. តេសុ ចក្ខុវិញ្ញាណាទីនិ យថាក្កមំ រូបាទិឯកេការម្មណានេវ.

៥៥. មនោធាតុត្តិកំ បន រូបាទិបញ្ចារម្មណំ.

៥៦. សេសានិ កាមាវចរវិបាកានិ ហសនចិត្តញ្ចេតិ សព្ពថាបិ កាមាវចរារម្មណានេវ.

៥៧. អកុសលានិ ចេវ ញាណវិប្បយុត្តកាមាវចរជវនានិ ចេតិ លោកុត្តរវជ្ជិតសព្ពារម្មណានិ.

៥៨. ញាណសម្បយុត្តកាមាវចរកុសលានិ ចេវ បញ្ចមជ្ឈានសង្ខាតំ អភិញ្ញាកុសលញ្ចេតិ អរហត្តមគ្គផលវជ្ជិតសព្ពារម្មណានិ.

៥៩. ញាណសម្បយុត្តកាមាវចរកិរិយានិ ចេវ កិរិយាភិញ្ញាវោដ្ឋព្ពនញ្ចេតិ សព្ពថាបិ សព្ពារម្មណានិ.

៦០. អារុប្បេសុ ទុតិយចតុត្ថានិ មហគ្គតារម្មណានិ.

៦១. សេសានិ មហគ្គតចិត្តានិ សព្ពានិបិ បញ្ញត្តារម្មណានិ.

៦២. លោកុត្តរចិត្តានិ និព្ពានារម្មណានីតិ.

៦៣. បញ្ចវីស បរិត្តម្ហិ, ឆ ចិត្តានិ មហគ្គតេ.

ឯកវីសតិ វោហារេ, អដ្ឋ និព្ពានគោចរេ.

វីសានុត្តរមុត្តម្ហិ, អគ្គមគ្គផលុជ្ឈិតេ;

បញ្ច សព្ពត្ថ ឆច្ចេតិ, សត្តធា តត្ថ សង្គហោ.

វត្ថុសង្គហោ

៦៤. វត្ថុសង្គហេ វត្ថូនិ នាម ចក្ខុសោតឃានជិវ្ហាកាយហទយវត្ថុ ចេតិ ឆព្ពិធានិ ភវន្តិ.

៦៥. តានិ កាមលោកេ សព្ពានិបិ លព្ភន្តិ.

៦៦. រូបលោកេ បន ឃានាទិត្តយំ នត្ថិ.

៦៧. អរូបលោកេ បន សព្ពានិបិ ន សំវិជ្ជន្តិ.

៦៨. តត្ថ បញ្ចវិញ្ញាណធាតុយោ យថាក្កមំ ឯកន្តេន បញ្ច បសាទវត្ថូនិ និស្សាយេវ បវត្តន្តិ.

៦៩. បញ្ចទ្វារាវជ្ជនសម្បដិច្ឆនសង្ខាតា បន មនោធាតុ ច ហទយំ និស្សិតាយេវ បវត្តន្តិ.

៧០. អវសេសា បន មនោវិញ្ញាណធាតុសង្ខាតា ច សន្តីរណមហាវិបាកបដិឃទ្វយបឋមមគ្គហសនរូបាវចរវសេន ហទយំ និស្សាយេវ បវត្តន្តិ.

៧១. អវសេសា កុសលាកុសលកិរិយានុត្តរវសេន បន និស្សាយ វា អនិស្សាយ វា.

៧២. អារុប្បវិបាកវសេន ហទយំ អនិស្សាយេវាតិ.

៧៣. ឆវត្ថុំ និស្សិតា កាមេ, សត្ត រូបេ ចតុព្ពិធា.

តិវត្ថុំ និស្សិតារុប្បេ, ធាត្វេកា និស្សិតា មតា.

៧៤. តេចត្តាលីស និស្សាយ, ទ្វេចត្តាលីស ជាយរេ.

និស្សាយ ច អនិស្សាយ, បាការុប្បា អនិស្សិតា.

ឥតិ អភិធម្មត្ថសង្គហេ បកិណ្ណកសង្គហវិភាគោ នាម

តតិយោ បរិច្ឆេទោ.