៧. បឋមអានន្ទសុត្តំ

៨៣៩. សាវត្ថិនិទានំ. អថ ខោ អាយស្មា អានន្ទោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ អាយស្មា អានន្ទោ ភគវន្តំ ឯតទវោច –

‘‘កតមា នុ ខោ, ភន្តេ, ឥទ្ធិ, កតមោ ឥទ្ធិបាទោ, កតមា ឥទ្ធិបាទភាវនា, កតមា ឥទ្ធិបាទភាវនាគាមិនី បដិបទា’’តិ? ‘‘ឥធានន្ទ, ភិក្ខុ អនេកវិហិតំ ឥទ្ធិវិធំ បច្ចនុភោតិ – ឯកោបិ ហុត្វា ពហុធា ហោតិ, ពហុធាបិ ហុត្វា ឯកោ ហោតិ…បេ… យាវ ព្រហ្មលោកាបិ កាយេន វសំ វត្តេតិ – អយំ វុច្ចតានន្ទ, ឥទ្ធិ’’.

‘‘កតមោ ចានន្ទ, ឥទ្ធិបាទោ? យោ, អានន្ទ, មគ្គោ យា បដិបទា ឥទ្ធិលាភាយ ឥទ្ធិបដិលាភាយ សំវត្តតិ – អយំ វុច្ចតានន្ទ, ឥទ្ធិបាទោ.

‘‘កតមា ចានន្ទ, ឥទ្ធិបាទភាវនា? ឥធានន្ទ, ភិក្ខុ ឆន្ទសមាធិប្បធានសង្ខារសមន្នាគតំ ឥទ្ធិបាទំ ភាវេតិ, វីរិយសមាធិ…បេ… ចិត្តសមាធិ…បេ… វីមំសាសមាធិប្បធានសង្ខារសមន្នាគតំ ឥទ្ធិបាទំ ភាវេតិ – អយំ វុច្ចតានន្ទ, ឥទ្ធិបាទភាវនា.

‘‘កតមា ចានន្ទ, ឥទ្ធិបាទភាវនាគាមិនី បដិបទា? អយមេវ អរិយោ អដ្ឋង្គិកោ មគ្គោ, សេយ្យថិទំ – សម្មាទិដ្ឋិ…បេ… សម្មាសមាធិ – អយំ វុច្ចតានន្ទ, ឥទ្ធិបាទភាវនាគាមិនី បដិបទា’’តិ. សត្តមំ.