៨. អាសវបញ្ហាសុត្តំ

៣២១. ‘‘‘អាសវោ, អាសវោ’តិ, អាវុសោ សារិបុត្ត, វុច្ចតិ. កតមោ នុ ខោ, អាវុសោ, អាសវោ’’តិ? ‘‘តយោ មេ, អាវុសោ, អាសវា. កាមាសវោ, ភវាសវោ, អវិជ្ជាសវោ – ឥមេ ខោ, អាវុសោ, តយោ អាសវា’’តិ. ‘‘អត្ថិ បនាវុសោ, មគ្គោ អត្ថិ បដិបទា ឯតេសំ អាសវានំ បហានាយា’’តិ? ‘‘អត្ថិ ខោ, អាវុសោ, មគ្គោ អត្ថិ បដិបទា ឯតេសំ អាសវានំ បហានាយា’’តិ. ‘‘កតមោ បនាវុសោ, មគ្គោ កតមា បដិបទា ឯតេសំ អាសវានំ បហានាយា’’តិ? ‘‘អយមេវ ខោ, អាវុសោ, អរិយោ អដ្ឋង្គិកោ មគ្គោ ឯតេសំ អាសវានំ បហានាយ, សេយ្យថិទំ – សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ. អយំ ខោ, អាវុសោ, មគ្គោ អយំ បដិបទា, ឯតេសំ អាសវានំ បហានាយា’’តិ. ‘‘ភទ្ទកោ, អាវុសោ, មគ្គោ ភទ្ទិកា បដិបទា, ឯតេសំ អាសវានំ បហានាយ. អលញ្ច បនាវុសោ សារិបុត្ត, អប្បមាទាយា’’តិ. អដ្ឋមំ.