៩. សុបណ្ណសំយុត្តំ

១. សុទ្ធិកសុត្តំ

៣៩២. សាវត្ថិនិទានំ. ‘‘ចតស្សោ ឥមា, ភិក្ខវេ, សុបណ្ណយោនិយោ. កតមា ចតស្សោ? អណ្ឌជា សុបណ្ណា, ជលាពុជា សុបណ្ណា, សំសេទជា សុបណ្ណា, ឱបបាតិកា សុបណ្ណា – ឥមា ខោ, ភិក្ខវេ, ចតស្សោ សុបណ្ណយោនិយោ’’តិ. បឋមំ.

២. ហរន្តិសុត្តំ

៣៩៣. សាវត្ថិនិទានំ. ‘‘ចតស្សោ ឥមា, ភិក្ខវេ, សុបណ្ណយោនិយោ. កតមា ចតស្សោ? អណ្ឌជា…បេ… ឥមា ខោ, ភិក្ខវេ, ចតស្សោ សុបណ្ណយោនិយោ. តត្រ, ភិក្ខវេ, អណ្ឌជា សុបណ្ណា អណ្ឌជេវ នាគេ ហរន្តិ, ន ជលាពុជេ, ន សំសេទជេ, ន ឱបបាតិកេ. តត្រ, ភិក្ខវេ, ជលាពុជា សុបណ្ណា អណ្ឌជេ ច ជលាពុជេ ច នាគេ ហរន្តិ, ន សំសេទជេ, ន ឱបបាតិកេ. តត្រ, ភិក្ខវេ, សំសេទជា សុបណ្ណា អណ្ឌជេ ច ជលាពុជេ ច សំសេទជេ ច នាគេ ហរន្តិ, ន ឱបបាតិកេ. តត្រ, ភិក្ខវេ, ឱបបាតិកា សុបណ្ណា អណ្ឌជេ ច ជលាពុជេ ច សំសេទជេ ច ឱបបាតិកេ ច នាគេ ហរន្តិ. ឥមា ខោ, ភិក្ខវេ, ចតស្សោ សុបណ្ណយោនិយោ’’តិ. ទុតិយំ.

៣. ទ្វយការីសុត្តំ

៣៩៤. សាវត្ថិនិទានំ. អញ្ញតរោ ភិក្ខុ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី. តស្ស សុតំ ហោតិ – ‘អណ្ឌជា សុបណ្ណា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជេយ្យ’ន្តិ. សោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតី’’តិ. តតិយំ.

៤-៦. ទុតិយាទិទ្វយការីសុត្តត្តិកំ

៣៩៥-៣៩៧. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា ជលាពុជានំ សុបណ្ណានំ…បេ… សំសេទជានំ សុបណ្ណានំ…បេ… ឱបបាតិកានំ សុបណ្ណានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី. តស្ស សុតំ ហោតិ – ‘ឱបបាតិកា សុបណ្ណា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជេយ្យ’ន្តិ. សោ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជតី’’តិ. ឆដ្ឋំ.

៧-១៦. អណ្ឌជទានូបការសុត្តទសកំ

៣៩៨-៤០៧. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី. តស្ស សុតំ ហោតិ – ‘អណ្ឌជា សុបណ្ណា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បានំ ទេតិ… វត្ថំ ទេតិ… យានំ ទេតិ… មាលំ ទេតិ… គន្ធំ ទេតិ… វិលេបនំ ទេតិ… សេយ្យំ ទេតិ… អាវសថំ ទេតិ… បទីបេយ្យំ ទេតិ. សោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ សុបណ្ណានំ សហព្យតំ ឧបបជ្ជតី’’តិ. សោឡសមំ.

១៧-៤៦. ជលាពុជាទិទានូបការសុត្តតិំសកំ

៤០៨-៤៣៧. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា ជលាពុជានំ សុបណ្ណានំ…បេ… សំសេទជានំ សុបណ្ណានំ…បេ… ឱបបាតិកានំ សុបណ្ណានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី. តស្ស សុតំ ហោតិ – ‘ឱបបាតិកា សុបណ្ណា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បានំ ទេតិ…បេ… បទីបេយ្យំ ទេតិ. សោ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា ឱបបាតិកានំ សុបណ្ណានំ សហព្យតំ ឧបបជ្ជតី’’តិ. ឆចត្តាលីសមំ.

(ឯវំ បិណ្ឌកេន ឆចត្តាលីសំ សុត្តន្តា ហោន្តិ.)

សុបណ្ណសំយុត្តំ សមត្តំ.