១០. គន្ធព្ពកាយសំយុត្តំ

១. សុទ្ធិកសុត្តំ

៤៣៨. ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ …បេ… ភគវា ឯតទវោច – ‘‘គន្ធព្ពកាយិកេ វោ, ភិក្ខវេ, ទេវេ ទេសេស្សាមិ. តំ សុណាថ. កតមា ច, ភិក្ខវេ, គន្ធព្ពកាយិកា ទេវា? សន្តិ, ភិក្ខវេ, មូលគន្ធេ អធិវត្ថា ទេវា. សន្តិ, ភិក្ខវេ, សារគន្ធេ អធិវត្ថា ទេវា. សន្តិ, ភិក្ខវេ, ផេគ្គុគន្ធេ អធិវត្ថា ទេវា. សន្តិ, ភិក្ខវេ, តចគន្ធេ អធិវត្ថា ទេវា. សន្តិ, ភិក្ខវេ, បបដិកគន្ធេ អធិវត្ថា ទេវា. សន្តិ, ភិក្ខវេ, បត្តគន្ធេ អធិវត្ថា ទេវា. សន្តិ, ភិក្ខវេ, បុប្ផគន្ធេ អធិវត្ថា ទេវា. សន្តិ, ភិក្ខវេ, ផលគន្ធេ អធិវត្ថា ទេវា. សន្តិ, ភិក្ខវេ, រសគន្ធេ អធិវត្ថា ទេវា. សន្តិ, ភិក្ខវេ, គន្ធគន្ធេ អធិវត្ថា ទេវា. ឥមេ វុច្ចន្តិ, ភិក្ខវេ, គន្ធព្ពកាយិកា ទេវា’’តិ. បឋមំ.

២. សុចរិតសុត្តំ

៤៣៩. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា គន្ធព្ពកាយិកានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘គន្ធព្ពកាយិកា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា គន្ធព្ពកាយិកានំ ទេវានំ សហព្យតំ ឧបបជ្ជេយ្យ’ន្តិ. សោ កាយស្ស ភេទា បរំ មរណា គន្ធព្ពកាយិកានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា គន្ធព្ពកាយិកានំ ទេវានំ សហព្យតំ ឧបបជ្ជតី’’តិ. ទុតិយំ.

៣. មូលគន្ធទាតាសុត្តំ

៤៤០. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘មូលគន្ធេ អធិវត្ថា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជេយ្យ’ន្តិ. សោ ទាតា ហោតិ មូលគន្ធានំ. សោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ…បេ… យេន មិធេកច្ចោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ. តតិយំ.

៤-១២. សារគន្ធាទិទាតាសុត្តនវកំ

៤៤១-៤៤៩. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា សារគន្ធេ អធិវត្ថានំ ទេវានំ…បេ… ផេគ្គុគន្ធេ អធិវត្ថានំ ទេវានំ… តចគន្ធេ អធិវត្ថានំ ទេវានំ… បបដិកគន្ធេ អធិវត្ថានំ ទេវានំ… បត្តគន្ធេ អធិវត្ថានំ ទេវានំ… បុប្ផគន្ធេ អធិវត្ថានំ ទេវានំ… ផលគន្ធេ អធិវត្ថានំ ទេវានំ… រសគន្ធេ អធិវត្ថានំ ទេវានំ… គន្ធគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘សារគន្ធេ អធិវត្ថា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា សារគន្ធេ អធិវត្ថានំ ទេវានំ…បេ… ផេគ្គុគន្ធេ អធិវត្ថានំ ទេវានំ… តចគន្ធេ អធិវត្ថានំ ទេវានំ… បបដិកគន្ធេ អធិវត្ថានំ ទេវានំ… បត្តគន្ធេ អធិវត្ថានំ ទេវានំ… បុប្ផគន្ធេ អធិវត្ថានំ ទេវានំ… ផលគន្ធេ អធិវត្ថានំ ទេវានំ… រសគន្ធេ អធិវត្ថានំ ទេវានំ… គន្ធគន្ធេ អធិវត្ថានំ ទេវានំ សហព្យតំ ឧបបជ្ជេយ្យ’ន្តិ. សោ ទាតា ហោតិ សារគន្ធានំ…បេ… សោ ទាតា ហោតិ ផេគ្គុគន្ធានំ… សោ ទាតា ហោតិ តចគន្ធានំ… សោ ទាតា ហោតិ បបដិកគន្ធានំ… សោ ទាតា ហោតិ បត្តគន្ធានំ… សោ ទាតា ហោតិ បុប្ផគន្ធានំ… សោ ទាតា ហោតិ ផលគន្ធានំ… សោ ទាតា ហោតិ រសគន្ធានំ… សោ ទាតា ហោតិ គន្ធគន្ធានំ. សោ កាយស្ស ភេទា បរំ មរណា គន្ធគន្ធេ អធិវត្ថានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា គន្ធគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ. ទ្វាទសមំ.

១៣-២២. មូលគន្ធទានូបការសុត្តទសកំ

៤៥០-៤៥៩. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘មូលគន្ធេ អធិវត្ថា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បានំ ទេតិ… វត្ថំ ទេតិ… យានំ ទេតិ… មាលំ ទេតិ… គន្ធំ ទេតិ… វិលេបនំ ទេតិ… សេយ្យំ ទេតិ… អាវសថំ ទេតិ… បទីបេយ្យំ ទេតិ. សោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា មូលគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ. ពាវីសតិមំ.

២៣-១១២. សារគន្ធាទិទានូបការសុត្តនវុតិកំ

៤៦០-៥៤៩. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា សារគន្ធេ អធិវត្ថានំ ទេវានំ…បេ… ផេគ្គុគន្ធេ អធិវត្ថានំ ទេវានំ… តចគន្ធេ អធិវត្ថានំ ទេវានំ … បបដិកគន្ធេ អធិវត្ថានំ ទេវានំ… បត្តគន្ធេ អធិវត្ថានំ ទេវានំ… បុប្ផគន្ធេ អធិវត្ថានំ ទេវានំ… ផលគន្ធេ អធិវត្ថានំ ទេវានំ… រសគន្ធេ អធិវត្ថានំ ទេវានំ… គន្ធគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘គន្ធគន្ធេ អធិវត្ថា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា គន្ធគន្ធេ អធិវត្ថានំ ទេវានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បានំ ទេតិ… វត្ថំ ទេតិ… យានំ ទេតិ… មាលំ ទេតិ… គន្ធំ ទេតិ… វិលេបនំ ទេតិ… សេយ្យំ ទេតិ… អាវសថំ ទេតិ… បទីបេយ្យំ ទេតិ. សោ កាយស្ស ភេទា បរំ មរណា គន្ធគន្ធេ អធិវត្ថានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា គន្ធគន្ធេ អធិវត្ថានំ ទេវានំ សហព្យតំ ឧបបជ្ជតី’’តិ. ទ្វាទសសតិមំ.

(ឯវំ បិណ្ឌកេន ឯកសតញ្ច ទ្វាទស ច សុត្តន្តា ហោន្តិ.)

គន្ធព្ពកាយសំយុត្តំ សមត្តំ.