១១. វលាហកសំយុត្តំ

១. សុទ្ធិកសុត្តំ

៥៥០. សាវត្ថិនិទានំ. ‘‘វលាហកកាយិកេ វោ, ភិក្ខវេ, ទេវេ ទេសេស្សាមិ. តំ សុណាថ. កតមេ ច, ភិក្ខវេ, វលាហកកាយិកា ទេវា? សន្តិ, ភិក្ខវេ, សីតវលាហកា ទេវា; សន្តិ ឧណ្ហវលាហកា ទេវា; សន្តិ អព្ភវលាហកា ទេវា; សន្តិ វាតវលាហកា ទេវា; សន្តិ វស្សវលាហកា ទេវា – ឥមេ វុច្ចន្តិ, ភិក្ខវេ, ‘វលាហកកាយិកា ទេវា’’’តិ. បឋមំ.

២. សុចរិតសុត្តំ

៥៥១. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា វលាហកកាយិកានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘វលាហកកាយិកា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា វលាហកកាយិកានំ ទេវានំ សហព្យតំ ឧបបជ្ជេយ្យ’ន្តិ. សោ កាយស្ស ភេទា បរំ មរណា វលាហកកាយិកានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា វលាហកកាយិកានំ ទេវានំ សហព្យតំ ឧបបជ្ជតី’’តិ. ទុតិយំ.

៣-១២. សីតវលាហកទានូបការសុត្តទសកំ

៥៥២-៥៦១. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា សីតវលាហកានំ ទេវានំ សហព្យតំ ឧបបជ្ជតី’’តិ? ‘‘ឥធ ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘សីតវលាហកា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា សីតវលាហកានំ ទេវានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បទីបេយ្យំ ទេតិ. សោ កាយស្ស ភេទា បរំ មរណា សីតវលាហកានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា សីតវលាហកានំ ទេវានំ សហព្យតំ ឧបបជ្ជតី’’តិ. ទ្វាទសមំ.

១៣-៥២. ឧណ្ហវលាហកទានូបការសុត្តចាលីសកំ

៥៦២-៦០១. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា ឧណ្ហវលាហកានំ ទេវានំ…បេ… អព្ភវលាហកានំ ទេវានំ…បេ… វាតវលាហកានំ ទេវានំ…បេ… វស្សវលាហកានំ ទេវានំ សហព្យតំ ឧបបជ្ជតី’’តិ? ‘‘ឥធ, ភិក្ខុ, ឯកច្ចោ កាយេន សុចរិតំ ចរតិ, វាចាយ សុចរិតំ ចរតិ, មនសា សុចរិតំ ចរតិ. តស្ស សុតំ ហោតិ – ‘វស្សវលាហកា ទេវា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា វស្សវលាហកានំ ទេវានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ…បេ… បទីបេយ្យំ ទេតិ. សោ កាយស្ស ភេទា បរំ មរណា វស្សវលាហកានំ ទេវានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា វស្សវលាហកានំ ទេវានំ សហព្យតំ ឧបបជ្ជតី’’តិ. ទ្វេបញ្ញាសមំ.

៥៣. សីតវលាហកសុត្តំ

៦០២. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា សីតំ ហោតី’’តិ? ‘‘សន្តិ, ភិក្ខុ, សីតវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ [រមេយ្យាមាតិ (សី. ស្យា. កំ. បី.) ឯវមុបរិបិ], តេសំ តំ ចេតោបណិធិមន្វាយ សីតំ ហោតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា សីតំ ហោតី’’តិ. តេបញ្ញាសមំ.

៥៤. ឧណ្ហវលាហកសុត្តំ

៦០៣. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា ឧណ្ហំ ហោតី’’តិ? ‘‘សន្តិ, ភិក្ខុ, ឧណ្ហវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ, តេសំ តំ ចេតោបណិធិមន្វាយ ឧណ្ហំ ហោតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា ឧណ្ហំ ហោតី’’តិ. ចតុបញ្ញាសមំ.

៥៥. អព្ភវលាហកសុត្តំ

៦០៤. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា អព្ភំ ហោតី’’តិ? ‘‘សន្តិ, ភិក្ខុ, អព្ភវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ, តេសំ តំ ចេតោបណិធិមន្វាយ អព្ភំ ហោតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា អព្ភំ ហោតី’’តិ. បញ្ចបញ្ញាសមំ.

៥៦. វាតវលាហកសុត្តំ

៦០៥. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា វាតោ ហោតី’’តិ? ‘‘សន្តិ, ភិក្ខុ, វាតវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ, តេសំ តំ ចេតោបណិធិមន្វាយ វាតោ ហោតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា វាតោ ហោតី’’តិ. ឆប្បញ្ញាសមំ.

៥៧. វស្សវលាហកសុត្តំ

៦០៦. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា ទេវោ វស្សតី’’តិ? ‘‘សន្តិ, ភិក្ខុ, វស្សវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ, តេសំ តំ ចេតោបណិធិមន្វាយ ទេវោ វស្សតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា ទេវោ វស្សតី’’តិ. សត្តបញ្ញាសមំ.

សត្តបញ្ញាសសុត្តន្តំ និដ្ឋិតំ.

វលាហកសំយុត្តំ សមត្តំ.