៩. និរោធសមាបត្តិសុត្តំ

៣៤០. សាវត្ថិនិទានំ. អថ ខោ អាយស្មា សារិបុត្តោ…បេ…. ‘‘ឥធាហំ, អាវុសោ, សព្ពសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរាមិ. តស្ស មយ្ហំ, អាវុសោ, ន ឯវំ ហោតិ – ‘អហំ សញ្ញាវេទយិតនិរោធំ សមាបជ្ជាមី’តិ វា ‘អហំ សញ្ញាវេទយិតនិរោធំ សមាបន្នោ’តិ វា ‘អហំ សញ្ញាវេទយិតនិរោធា វុដ្ឋិតោ’តិ វា’’តិ. ‘‘តថា ហិ បនាយស្មតោ សារិបុត្តស្ស ទីឃរត្តំ អហង្ការមមង្ការមានានុសយា សុសមូហតា. តស្មា អាយស្មតោ សារិបុត្តស្ស ន ឯវំ ហោតិ – ‘អហំ សញ្ញាវេទយិតនិរោធំ សមាបជ្ជាមី’តិ វា ‘អហំ សញ្ញាវេទយិតនិរោធំ សមាបន្នោ’តិ វា ‘អហំ សញ្ញាវេទយិតនិរោធា វុដ្ឋិតោ’តិ វា’’តិ. នវមំ.