៥៧. វស្សវលាហកសុត្តំ

៦០៦. សាវត្ថិនិទានំ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេនេកទា ទេវោ វស្សតី’’តិ? ‘‘សន្តិ, ភិក្ខុ, វស្សវលាហកា នាម ទេវា. តេសំ យទា ឯវំ ហោតិ – ‘យំនូន មយំ សកាយ រតិយា វសេយ្យាមា’តិ, តេសំ តំ ចេតោបណិធិមន្វាយ ទេវោ វស្សតិ. អយំ ខោ, ភិក្ខុ, ហេតុ, អយំ បច្ចយោ, យេនេកទា ទេវោ វស្សតី’’តិ. សត្តបញ្ញាសមំ.

សត្តបញ្ញាសសុត្តន្តំ និដ្ឋិតំ.

វលាហកសំយុត្តំ សមត្តំ.