៤. ឱក្ខាសុត្តំ

២២៦. សាវត្ថិយំ វិហរតិ…បេ… ‘‘យោ, ភិក្ខវេ, បុព្ពណ្ហសមយំ ឱក្ខាសតំ ទានំ ទទេយ្យ, យោ មជ្ឈន្ហិកសមយំ ឱក្ខាសតំ ទានំ ទទេយ្យ, យោ សាយន្ហសមយំ ឱក្ខាសតំ ទានំ ទទេយ្យ, យោ វា បុព្ពណ្ហសមយំ អន្តមសោ គទ្ទុហនមត្តម្បិ មេត្តចិត្តំ ភាវេយ្យ, យោ វា មជ្ឈន្ហិកសមយំ អន្តមសោ គទ្ទុហនមត្តម្បិ មេត្តចិត្តំ ភាវេយ្យ, យោ វា សាយន្ហសមយំ អន្តមសោ គទ្ទុហនមត្តម្បិ មេត្តចិត្តំ ភាវេយ្យ, ឥទំ តតោ មហប្ផលតរំ. តស្មាតិហ, ភិក្ខវេ, ឯវំ សិក្ខិតព្ពំ – ‘មេត្តា នោ ចេតោវិមុត្តិ ភាវិតា ភវិស្សតិ ពហុលីកតា យានីកតា វត្ថុកតា អនុដ្ឋិតា បរិចិតា សុសមារទ្ធា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. ចតុត្ថំ.