១០. ថេរនាមកសុត្តំ

២៤៤. ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ. តេន ខោ បន សមយេន អញ្ញតរោ ភិក្ខុ ថេរនាមកោ ឯកវិហារី ចេវ ហោតិ ឯកវិហារស្ស ច វណ្ណវាទី. សោ ឯកោ គាមំ បិណ្ឌាយ បវិសតិ ឯកោ បដិក្កមតិ ឯកោ រហោ និសីទតិ ឯកោ ចង្កមំ អធិដ្ឋាតិ. អថ ខោ សម្ពហុលា ភិក្ខូ យេន ភគវា តេនុបសង្កមិំសុ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិំសុ. ឯកមន្តំ និសិន្នា ខោ តេ ភិក្ខូ ភគវន្តំ ឯតទវោចុំ – ‘‘ឥធ, ភន្តេ, អញ្ញតរោ ភិក្ខុ ថេរនាមកោ ឯកវិហារី ឯកវិហារស្ស ច វណ្ណវាទី’’តិ.

អថ ខោ ភគវា អញ្ញតរំ ភិក្ខុំ អាមន្តេសិ – ‘‘ឯហិ ត្វំ, ភិក្ខុ, មម វចនេន ថេរំ ភិក្ខុំ អាមន្តេហិ – ‘សត្ថា តំ, អាវុសោ ថេរ, អាមន្តេតី’’’តិ. ‘‘ឯវំ, ភន្តេ’’តិ ខោ សោ ភិក្ខុ ភគវតោ បដិស្សុត្វា យេនាយស្មា ថេរោ តេនុបសង្កមិ; ឧបសង្កមិត្វា អាយស្មន្តំ ថេរំ ឯតទវោច – ‘‘សត្ថា តំ, អាវុសោ ថេរ, អាមន្តេតី’’តិ. ‘‘ឯវមាវុសោ’’តិ ខោ អាយស្មា ថេរោ តស្ស ភិក្ខុនោ បដិស្សុត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នំ ខោ អាយស្មន្តំ ថេរំ ភគវា ឯតទវោច – ‘‘សច្ចំ កិរ ត្វំ, ថេរ, ឯកវិហារី ឯកវិហារស្ស ច វណ្ណវាទី’’តិ? ‘‘ឯវំ, ភន្តេ’’. ‘‘យថា កថំ បន ត្វំ, ថេរ, ឯកវិហារី ឯកវិហារស្ស ច វណ្ណវាទី’’តិ? ‘‘ឥធាហំ, ភន្តេ, ឯកោ គាមំ បិណ្ឌាយ បវិសាមិ ឯកោ បដិក្កមាមិ ឯកោ រហោ និសីទាមិ ឯកោ ចង្កមំ អធិដ្ឋាមិ. ឯវំ ខ្វាហំ, ភន្តេ, ឯកវិហារី ឯកវិហារស្ស ច វណ្ណវាទី’’តិ.

‘‘អត្ថេសោ, ថេរ, ឯកវិហារោ នេសោ នត្ថីតិ វទាមិ. អបិ ច, ថេរ, យថា ឯកវិហារោ វិត្ថារេន បរិបុណ្ណោ ហោតិ តំ សុណាហិ, សាធុកំ មនសិ ករោហិ; ភាសិស្សាមី’’តិ. ‘‘ឯវំ, ភន្តេ’’តិ ខោ…បេ…. ‘‘កថញ្ច, ថេរ, ឯកវិហារោ វិត្ថារេន បរិបុណ្ណោ ហោតិ. ឥធ, ថេរ, យំ អតីតំ តំ បហីនំ, យំ អនាគតំ តំ បដិនិស្សដ្ឋំ, បច្ចុប្បន្នេសុ ច អត្តភាវបដិលាភេសុ ឆន្ទរាគោ សុប្បដិវិនីតោ. ឯវំ ខោ, ថេរ, ឯកវិហារោ វិត្ថារេន បរិបុណ្ណោ ហោតី’’តិ.

ឥទមវោច ភគវា. ឥទំ វត្វាន សុគតោ អថាបរំ ឯតទវោច សត្ថា –

‘‘សព្ពាភិភុំ សព្ពវិទុំ សុមេធំ,

សព្ពេសុ ធម្មេសុ អនូបលិត្តំ;

សព្ពញ្ជហំ តណ្ហាក្ខយេ វិមុត្តំ,

តមហំ នរំ ឯកវិហារីតិ ព្រូមី’’តិ. ទសមំ;