៩. កោណ្ឌញ្ញសុត្តំ

២១៧. ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ. អថ ខោ អាយស្មា អញ្ញាសិកោណ្ឌញ្ញោ [អញ្ញាកោណ្ឌញ្ញោ (សី. ស្យា. កំ.)] សុចិរស្សេវ យេន ភគវា តេនុបសង្កមិ; ឧបសង្កមិត្វា ភគវតោ បាទេសុ សិរសា និបតិត្វា ភគវតោ បាទានិ មុខេន ច បរិចុម្ពតិ, បាណីហិ ច បរិសម្ពាហតិ, នាមញ្ច សាវេតិ – ‘‘កោណ្ឌញ្ញោហំ, ភគវា, កោណ្ឌញ្ញោហំ, សុគតា’’តិ. អថ ខោ អាយស្មតោ វង្គីសស្ស ឯតទហោសិ – ‘‘អយំ ខោ អាយស្មា អញ្ញាសិកោណ្ឌញ្ញោ សុចិរស្សេវ យេន ភគវា តេនុបសង្កមិ; ឧបសង្កមិត្វា ភគវតោ បាទេសុ សិរសា និបតិត្វា ភគវតោ បាទានិ មុខេន ច បរិចុម្ពតិ, បាណីហិ ច បរិសម្ពាហតិ, នាមញ្ច សាវេតិ – ‘កោណ្ឌញ្ញោហំ, ភគវា, កោណ្ឌញ្ញោហំ, សុគតា’តិ. យំនូនាហំ អាយស្មន្តំ អញ្ញាសិកោណ្ឌញ្ញំ ភគវតោ សម្មុខា សារុប្បាហិ គាថាហិ អភិត្ថវេយ្យ’’ន្តិ.

អថ ខោ អាយស្មា វង្គីសោ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិំ បណាមេត្វា ភគវន្តំ ឯតទវោច – ‘‘បដិភាតិ មំ, ភគវា, បដិភាតិ មំ, សុគតា’’តិ. ‘‘បដិភាតុ តំ, វង្គីសា’’តិ ភគវា អវោច. អថ ខោ អាយស្មា វង្គីសោ អាយស្មន្តំ អញ្ញាសិកោណ្ឌញ្ញំ ភគវតោ សម្មុខា សារុប្បាហិ គាថាហិ អភិត្ថវិ –

‘‘ពុទ្ធានុពុទ្ធោ សោ ថេរោ, កោណ្ឌញ្ញោ តិព្ពនិក្កមោ;

លាភី សុខវិហារានំ, វិវេកានំ អភិណ្ហសោ.

‘‘យំ សាវកេន បត្តព្ពំ, សត្ថុសាសនការិនា;

សព្ពស្ស តំ អនុប្បត្តំ, អប្បមត្តស្ស សិក្ខតោ.

‘‘មហានុភាវោ តេវិជ្ជោ, ចេតោបរិយាយកោវិទោ;

កោណ្ឌញ្ញោ ពុទ្ធទាយាទោ [ពុទ្ធសាវកោ (បី.)], បាទេ វន្ទតិ សត្ថុនោ’’តិ.