៧. បវារណាសុត្តំ

២១៥. ឯកំ សមយំ ភគវា សាវត្ថិយំ វិហរតិ បុព្ពារាមេ មិគារមាតុបាសាទេ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សព្ពេហេវ អរហន្តេហិ. តេន ខោ បន សមយេន ភគវា តទហុបោសថេ បន្នរសេ បវារណាយ ភិក្ខុសង្ឃបរិវុតោ អព្ភោកាសេ និសិន្នោ ហោតិ. អថ ខោ ភគវា តុណ្ហីភូតំ ភិក្ខុសង្ឃំ អនុវិលោកេត្វា ភិក្ខូ អាមន្តេសិ – ‘‘ហន្ទ ទានិ, ភិក្ខវេ, បវារេមិ វោ. ន ច មេ កិញ្ចិ គរហថ កាយិកំ វា វាចសិកំ វា’’តិ.

ឯវំ វុត្តេ, អាយស្មា សារិបុត្តោ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិំ បណាមេត្វា ភគវន្តំ ឯតទវោច – ‘‘ន ខោ មយំ, ភន្តេ, ភគវតោ កិញ្ចិ គរហាម កាយិកំ វា វាចសិកំ វា. ភគវា ហិ, ភន្តេ, អនុប្បន្នស្ស មគ្គស្ស ឧប្បាទេតា, អសញ្ជាតស្ស មគ្គស្ស សញ្ជនេតា, អនក្ខាតស្ស មគ្គស្ស អក្ខាតា, មគ្គញ្ញូ មគ្គវិទូ មគ្គកោវិទោ. មគ្គានុគា ច, ភន្តេ, ឯតរហិ សាវកា វិហរន្តិ បច្ឆា សមន្នាគតា; អហញ្ច ខោ, ភន្តេ, ភគវន្តំ បវារេមិ. ន ច មេ ភគវា កិញ្ចិ គរហតិ កាយិកំ វា វាចសិកំ វា’’តិ.

‘‘ន ខ្វាហំ តេ, សារិបុត្ត, កិញ្ចិ គរហាមិ កាយិកំ វា វាចសិកំ វា. បណ្ឌិតោ ត្វំ, សារិបុត្ត, មហាបញ្ញោ ត្វំ, សារិបុត្ត, បុថុបញ្ញោ ត្វំ, សារិបុត្ត, ហាសបញ្ញោ ត្វំ, សារិបុត្ត, ជវនបញ្ញោ ត្វំ, សារិបុត្ត, តិក្ខបញ្ញោ ត្វំ, សារិបុត្ត, និព្ពេធិកបញ្ញោ ត្វំ, សារិបុត្ត. សេយ្យថាបិ, សារិបុត្ត, រញ្ញោ ចក្កវត្តិស្ស ជេដ្ឋបុត្តោ បិតរា បវត្តិតំ ចក្កំ សម្មទេវ អនុប្បវត្តេតិ; ឯវមេវ ខោ ត្វំ, សារិបុត្ត, មយា អនុត្តរំ ធម្មចក្កំ បវត្តិតំ សម្មទេវ អនុប្បវត្តេសី’’តិ.

‘‘នោ ចេ កិរ មេ, ភន្តេ, ភគវា កិញ្ចិ គរហតិ កាយិកំ វា វាចសិកំ វា. ឥមេសំ បន, ភន្តេ, ភគវា បញ្ចន្នំ ភិក្ខុសតានំ ន កិញ្ចិ គរហតិ កាយិកំ វា វាចសិកំ វា’’តិ. ‘‘ឥមេសម្បិ ខ្វាហំ, សារិបុត្ត, បញ្ចន្នំ ភិក្ខុសតានំ ន កិញ្ចិ គរហាមិ កាយិកំ វា វាចសិកំ វា. ឥមេសញ្ហិ, សារិបុត្ត, បញ្ចន្នំ ភិក្ខុសតានំ សដ្ឋិ ភិក្ខូ តេវិជ្ជា, សដ្ឋិ ភិក្ខូ ឆឡភិញ្ញា, សដ្ឋិ ភិក្ខូ ឧភតោភាគវិមុត្តា, អថ ឥតរេ បញ្ញាវិមុត្តា’’តិ.

អថ ខោ អាយស្មា វង្គីសោ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិំ បណាមេត្វា ភគវន្តំ ឯតទវោច – ‘‘បដិភាតិ មំ ភគវា, បដិភាតិ មំ សុគតា’’តិ. ‘‘បដិភាតុ តំ, វង្គីសា’’តិ ភគវា អវោច. អថ ខោ អាយស្មា វង្គីសោ ភគវន្តំ សម្មុខា សារុប្បាហិ គាថាហិ អភិត្ថវិ –

‘‘អជ្ជ បន្នរសេ វិសុទ្ធិយា, ភិក្ខូ បញ្ចសតា សមាគតា;

សំយោជនពន្ធនច្ឆិទា, អនីឃា ខីណបុនព្ភវា ឥសី.

‘‘ចក្កវត្តី យថា រាជា, អមច្ចបរិវារិតោ;

សមន្តា អនុបរិយេតិ, សាគរន្តំ មហិំ ឥមំ.

‘‘ឯវំ វិជិតសង្គាមំ, សត្ថវាហំ អនុត្តរំ;

សាវកា បយិរុបាសន្តិ, តេវិជ្ជា មច្ចុហាយិនោ.

‘‘សព្ពេ ភគវតោ បុត្តា, បលាបេត្ថ ន វិជ្ជតិ;

តណ្ហាសល្លស្ស ហន្តារំ, វន្ទេ អាទិច្ចពន្ធុន’’ន្តិ.