៣. បេសលសុត្តំ

២១១. ឯកំ សមយំ អាយស្មា វង្គីសោ អាឡវិយំ វិហរតិ អគ្គាឡវេ ចេតិយេ អាយស្មតា និគ្រោធកប្បេន ឧបជ្ឈាយេន សទ្ធិំ. តេន ខោ បន សមយេន អាយស្មា វង្គីសោ អត្តនោ បដិភានេន អញ្ញេ បេសលេ ភិក្ខូ អតិមញ្ញតិ. អថ ខោ អាយស្មតោ វង្គីសស្ស ឯតទហោសិ – ‘‘អលាភា វត មេ, ន វត មេ លាភា; ទុល្លទ្ធំ វត មេ, ន វត មេ សុលទ្ធំ; យ្វាហំ អត្តនោ បដិភានេន អញ្ញេ បេសលេ ភិក្ខូ អតិមញ្ញាមី’’តិ. អថ ខោ អាយស្មា វង្គីសោ អត្តនាវ អត្តនោ វិប្បដិសារំ ឧប្បាទេត្វា តាយំ វេលាយំ ឥមា គាថាយោ អភាសិ –

‘‘មានំ បជហស្សុ គោតម, មានបថញ្ច បជហស្សុ;

អសេសំ មានបថស្មិំ, សមុច្ឆិតោ វិប្បដិសារីហុវា ចិររត្តំ.

‘‘មក្ខេន មក្ខិតា បជា, មានហតា និរយំ បបតន្តិ;

សោចន្តិ ជនា ចិររត្តំ, មានហតា និរយំ ឧបបន្នា.

‘‘ន ហិ សោចតិ ភិក្ខុ កទាចិ, មគ្គជិនោ សម្មាបដិបន្នោ;

កិត្តិញ្ច សុខញ្ច អនុភោតិ, ធម្មទសោតិ តមាហុ បហិតត្តំ.

‘‘តស្មា អខិលោធ បធានវា, នីវរណានិ បហាយ វិសុទ្ធោ;

មានញ្ច បហាយ អសេសំ, វិជ្ជាយន្តករោ សមិតាវី’’តិ.