៧. ឧបចាលាសុត្តំ

១៦៨. សាវត្ថិនិទានំ. អថ ខោ ឧបចាលា ភិក្ខុនី បុព្ពណ្ហសមយំ និវាសេត្វា…បេ… អញ្ញតរស្មិំ រុក្ខមូលេ ទិវាវិហារំ និសីទិ. អថ ខោ មារោ បាបិមា យេន ឧបចាលា ភិក្ខុនី តេនុបសង្កមិ; ឧបសង្កមិត្វា ឧបចាលំ ភិក្ខុនិំ ឯតទវោច – ‘‘កត្ថ នុ ត្វំ, ភិក្ខុនិ, ឧប្បជ្ជិតុកាមា’’តិ? ‘‘ន ខ្វាហំ, អាវុសោ, កត្ថចិ ឧប្បជ្ជិតុកាមា’’តិ.

‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

តត្ថ ចិត្តំ បណិធេហិ, រតិំ បច្ចនុភោស្សសី’’តិ.

‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

កាមពន្ធនពទ្ធា តេ, ឯន្តិ មារវសំ បុន.

‘‘សព្ពោ អាទីបិតោ [សព្ពោវ អាទិត្តោ (ស្យា. កំ.)] លោកោ, សព្ពោ លោកោ បធូបិតោ;

សព្ពោ បជ្ជលិតោ [បជ្ជលិតោ (សព្ពត្ថ)] លោកោ, សព្ពោ លោកោ បកម្បិតោ.

‘‘អកម្បិតំ អបជ្ជលិតំ [អចលិតំ (សី. ស្យា. កំ. បី.)], អបុថុជ្ជនសេវិតំ;

អគតិ យត្ថ មារស្ស, តត្ថ មេ និរតោ មនោ’’តិ.

អថ ខោ មារោ បាបិមា ‘‘ជានាតិ មំ ឧបចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ.