៤. មណិភទ្ទសុត្តំ

២៣៨. ឯកំ សមយំ ភគវា មគធេសុ វិហរតិ មណិមាលិកេ ចេតិយេ មណិភទ្ទស្ស យក្ខស្ស ភវនេ. អថ ខោ មណិភទ្ទោ យក្ខោ យេន ភគវា តេនុបសង្កមិ; ឧបសង្កមិត្វា ភគវតោ សន្តិកេ ឥមំ គាថំ អភាសិ –

‘‘សតីមតោ សទា ភទ្ទំ, សតិមា សុខមេធតិ;

សតីមតោ សុវេ សេយ្យោ, វេរា ច បរិមុច្ចតី’’តិ.

‘‘សតីមតោ សទា ភទ្ទំ, សតិមា សុខមេធតិ;

សតីមតោ សុវេ សេយ្យោ, វេរា ន បរិមុច្ចតិ.

‘‘យស្ស សព្ពមហោរត្តំ [រត្តិំ (ស្យា. កំ. ក.)], អហិំសាយ រតោ មនោ;

មេត្តំ សោ សព្ពភូតេសុ, វេរំ តស្ស ន កេនចី’’តិ.