១. ឥន្ទកសុត្តំ

២៣៥. ឯវំ មេ សុតំ – ឯកំ សមយំ ភគវា រាជគហេ វិហរតិ ឥន្ទកូដេ បព្ពតេ, ឥន្ទកស្ស យក្ខស្ស ភវនេ. អថ ខោ ឥន្ទកោ យក្ខោ យេន ភគវា តេនុបសង្កមិ; ឧបសង្កមិត្វា ភគវន្តំ គាថាយ អជ្ឈភាសិ –

‘‘រូបំ ន ជីវន្តិ វទន្តិ ពុទ្ធា, កថំ ន្វយំ វិន្ទតិមំ សរីរំ;

កុតស្ស អដ្ឋីយកបិណ្ឌមេតិ, កថំ ន្វយំ សជ្ជតិ គព្ភរស្មិ’’ន្តិ.

‘‘បឋមំ កលលំ ហោតិ, កលលា ហោតិ អព្ពុទំ;

អព្ពុទា ជាយតេ បេសិ, បេសិ និព្ពត្តតី ឃនោ;

ឃនា បសាខា ជាយន្តិ, កេសា លោមា នខាបិ ច.

‘‘យញ្ចស្ស ភុញ្ជតី មាតា, អន្នំ បានញ្ច ភោជនំ;

តេន សោ តត្ថ យាបេតិ, មាតុកុច្ឆិគតោ នរោ’’តិ.