៩. ព្រហ្មនិមន្តនិកសុត្តំ

៥០១. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តត្រ ខោ ភគវា ភិក្ខូ អាមន្តេសិ – ‘‘ភិក្ខវោ’’តិ. ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ. ភគវា ឯតទវោច –

‘‘ឯកមិទាហំ, ភិក្ខវេ, សមយំ ឧក្កដ្ឋាយំ វិហរាមិ សុភគវនេ សាលរាជមូលេ. តេន ខោ បន, ភិក្ខវេ, សមយេន ពកស្ស ព្រហ្មុនោ ឯវរូបំ បាបកំ ទិដ្ឋិគតំ ឧប្បន្នំ ហោតិ – ‘ឥទំ និច្ចំ, ឥទំ ធុវំ, ឥទំ សស្សតំ, ឥទំ កេវលំ, ឥទំ អចវនធម្មំ, ឥទញ្ហិ ន ជាយតិ ន ជីយតិ ន មីយតិ ន ចវតិ ន ឧបបជ្ជតិ, ឥតោ ច បនញ្ញំ ឧត្តរិ និស្សរណំ នត្ថី’តិ. អថ ខ្វាហំ, ភិក្ខវេ, ពកស្ស ព្រហ្មុនោ ចេតសា ចេតោបរិវិតក្កមញ្ញាយ – សេយ្យថាបិ នាម ពលវា បុរិសោ សមិញ្ជិតំ វា ពាហំ បសារេយ្យ, បសារិតំ វា ពាហំ សមិញ្ជេយ្យ, ឯវមេវ – ឧក្កដ្ឋាយំ សុភគវនេ សាលរាជមូលេ អន្តរហិតោ តស្មិំ ព្រហ្មលោកេ បាតុរហោសិំ. អទ្ទសា ខោ មំ, ភិក្ខវេ, ពកោ ព្រហ្មា ទូរតោវ អាគច្ឆន្តំ; ទិស្វាន មំ ឯតទវោច – ‘ឯហិ ខោ, មារិស, ស្វាគតំ, មារិស! ចិរស្សំ ខោ, មារិស, ឥមំ បរិយាយមកាសិ យទិទំ ឥធាគមនាយ. ឥទញ្ហិ, មារិស, និច្ចំ, ឥទំ ធុវំ, ឥទំ សស្សតំ, ឥទំ កេវលំ, ឥទំ អចវនធម្មំ, ឥទញ្ហិ ន ជាយតិ ន ជីយតិ ន មីយតិ ន ចវតិ ន ឧបបជ្ជតិ. ឥតោ ច បនញ្ញំ ឧត្តរិ និស្សរណំ នត្ថី’’’តិ.

ឯវំ វុត្តេ, អហំ, ភិក្ខវេ, ពកំ ព្រហ្មានំ ឯតទវោចំ – ‘‘អវិជ្ជាគតោ វត, ភោ, ពកោ ព្រហ្មា; អវិជ្ជាគតោ វត, ភោ, ពកោ ព្រហ្មា; យត្រ ហិ នាម អនិច្ចំយេវ សមានំ និច្ចន្តិ វក្ខតិ, អទ្ធុវំយេវ សមានំ ធុវន្តិ វក្ខតិ, អសស្សតំយេវ សមានំ សស្សតន្តិ វក្ខតិ, អកេវលំយេវ សមានំ កេវលន្តិ វក្ខតិ, ចវនធម្មំយេវ សមានំ អចវនធម្មន្តិ វក្ខតិ; យត្ថ ច បន ជាយតិ ជីយតិ មីយតិ ចវតិ ឧបបជ្ជតិ តញ្ច វក្ខតិ – ‘ឥទញ្ហិ ន ជាយតិ ន ជីយតិ ន មីយតិ ន ចវតិ ន ឧបបជ្ជតី’តិ; សន្តញ្ច បនញ្ញំ ឧត្តរិ និស្សរណំ ‘នត្ថញ្ញំ ឧត្តរិ និស្សរណ’ន្តិ វក្ខតី’’តិ.

៥០២. ‘‘អថ ខោ, ភិក្ខវេ, មារោ បាបិមា អញ្ញតរំ ព្រហ្មបារិសជ្ជំ អន្វាវិសិត្វា មំ ឯតទវោច – ‘ភិក្ខុ, ភិក្ខុ, មេតមាសទោ មេតមាសទោ, ឯសោ ហិ, ភិក្ខុ, ព្រហ្មា មហាព្រហ្មា អភិភូ អនភិភូតោ អញ្ញទត្ថុទសោ វសវត្តី ឥស្សរោ កត្តា និម្មាតា សេដ្ឋោ សជិតា [សជ្ជិតា (ស្យា. កំ. ក.), សញ្ជិតា (សី. បី.)] វសី បិតា ភូតភព្យានំ. អហេសុំ ខោ យេ, ភិក្ខុ, តយា បុព្ពេ សមណព្រាហ្មណា លោកស្មិំ បថវីគរហកា បថវីជិគុច្ឆកា, អាបគរហកា អាបជិគុច្ឆកា, តេជគរហកា តេជជិគុច្ឆកា, វាយគរហកា វាយជិគុច្ឆកា, ភូតគរហកា ភូតជិគុច្ឆកា, ទេវគរហកា ទេវជិគុច្ឆកា, បជាបតិគរហកា បជាបតិជិគុច្ឆកា, ព្រហ្មគរហកា ព្រហ្មជិគុច្ឆកា – តេ កាយស្ស ភេទា បាណុបច្ឆេទា ហីនេ កាយេ បតិដ្ឋិតា អហេសុំ. យេ បន, ភិក្ខុ, តយា បុព្ពេ សមណព្រាហ្មណា លោកស្មិំ បថវីបសំសកា បថវាភិនន្ទិនោ, អាបបសំសកា អាបាភិនន្ទិនោ, តេជបសំសកា តេជាភិនន្ទិនោ, វាយបសំសកា វាយាភិនន្ទិនោ, ភូតបសំសកា ភូតាភិនន្ទិនោ, ទេវបសំសកា ទេវាភិនន្ទិនោ, បជាបតិបសំសកា បជាបតាភិនន្ទិនោ, ព្រហ្មបសំសកា ព្រហ្មាភិនន្ទិនោ – តេ កាយស្ស ភេទា បាណុបច្ឆេទា បណីតេ កាយេ បតិដ្ឋិតា. តំ តាហំ, ភិក្ខុ, ឯវំ វទាមិ – ‘ឥង្ឃ ត្វំ, មារិស, យទេវ តេ ព្រហ្មា អាហ តទេវ ត្វំ ករោហិ, មា ត្វំ ព្រហ្មុនោ វចនំ ឧបាតិវត្តិត្ថោ’. សចេ ខោ ត្វំ, ភិក្ខុ, ព្រហ្មុនោ វចនំ ឧបាតិវត្តិស្សសិ, សេយ្យថាបិ នាម បុរិសោ សិរិំ អាគច្ឆន្តិំ ទណ្ឌេន បដិប្បណាមេយ្យ, សេយ្យថាបិ វា បន, ភិក្ខុ, បុរិសោ នរកប្បបាតេ បបតន្តោ ហត្ថេហិ ច បាទេហិ ច បថវិំ វិរាធេយ្យ, ឯវំ សម្បទមិទំ, ភិក្ខុ, តុយ្ហំ ភវិស្សតិ. ‘ឥង្ឃំ ត្វំ, មារិស, យទេវ តេ ព្រហ្មា អាហ តទេវ ត្វំ ករោហិ, មា ត្វំ ព្រហ្មុនោ វចនំ ឧបាតិវត្តិត្ថោ. ននុ ត្វំ, ភិក្ខុ, បស្សសិ ព្រហ្មបរិសំ សន្និបតិត’ន្តិ? ឥតិ ខោ មំ, ភិក្ខវេ, មារោ បាបិមា ព្រហ្មបរិសំ ឧបនេសិ.

‘‘ឯវំ វុត្តេ, អហំ, ភិក្ខវេ, មារំ បាបិមន្តំ ឯតទវោចំ – ‘ជានាមិ ខោ តាហំ, បាបិម; មា ត្វំ មញ្ញិត្ថោ – ន មំ ជានាតី’តិ. មារោ ត្វមសិ, បាបិម. យោ ចេវ, បាបិម, ព្រហ្មា, យា ច ព្រហ្មបរិសា, យេ ច ព្រហ្មបារិសជ្ជា, សព្ពេវ តវ ហត្ថគតា សព្ពេវ តវ វសំគតា. តុយ្ហញ្ហិ, បាបិម, ឯវំ ហោតិ – ‘ឯសោបិ មេ អស្ស ហត្ថគតោ, ឯសោបិ មេ អស្ស វសំគតោ’តិ. អហំ ខោ បន, បាបិម, នេវ តវ ហត្ថគតោ នេវ តវ វសំគតោ’’តិ.

៥០៣. ‘‘ឯវំ វុត្តេ, ភិក្ខវេ, ពកោ ព្រហ្មា មំ ឯតទវោច – ‘អហញ្ហិ, មារិស, និច្ចំយេវ សមានំ និច្ចន្តិ វទាមិ, ធុវំយេវ សមានំ ធុវន្តិ វទាមិ, សស្សតំយេវ សមានំ សស្សតន្តិ វទាមិ, កេវលំយេវ សមានំ កេវលន្តិ វទាមិ, អចវនធម្មំយេវ សមានំ អចវនធម្ម’ន្តិ វទាមិ, យត្ថ ច បន ន ជាយតិ ន ជីយតិ ន មីយតិ ន ចវតិ ន ឧបបជ្ជតិ តទេវាហំ វទាមិ – ‘ឥទញ្ហិ ន ជាយតិ ន ជីយតិ ន មីយតិ ន ចវតិ ន ឧបបជ្ជតី’តិ. អសន្តញ្ច បនញ្ញំ ឧត្តរិ និស្សរណំ ‘នត្ថញ្ញំ ឧត្តរិ និស្សរណ’ន្តិ វទាមិ. អហេសុំ ខោ, ភិក្ខុ, តយា បុព្ពេ សមណព្រាហ្មណា លោកស្មិំ យាវតកំ តុយ្ហំ កសិណំ អាយុ តាវតកំ តេសំ តបោកម្មមេវ អហោសិ. តេ ខោ ឯវំ ជានេយ្យុំ – ‘សន្តញ្ច បនញ្ញំ ឧត្តរិ និស្សរណំ អត្ថញ្ញំ ឧត្តរិ និស្សរណន្តិ, អសន្តំ វា អញ្ញំ ឧត្តរិ និស្សរណំ នត្ថញ្ញំ ឧត្តរិ និស្សរណ’ន្តិ. តំ តាហំ, ភិក្ខុ, ឯវំ វទាមិ – ‘ន ចេវញ្ញំ ឧត្តរិ និស្សរណំ ទក្ខិស្សសិ, យាវទេវ ច បន កិលមថស្ស វិឃាតស្ស ភាគី ភវិស្សសិ. សចេ ខោ ត្វំ, ភិក្ខុ, បថវិំ អជ្ឈោសិស្សសិ, ឱបសាយិកោ មេ ភវិស្សសិ វត្ថុសាយិកោ, យថាកាមករណីយោ ពាហិតេយ្យោ. សចេ អាបំ… តេជំ… វាយំ… ភូតេ… ទេវេ… បជាបតិំ… ព្រហ្មំ អជ្ឈោសិស្សសិ, ឱបសាយិកោ មេ ភវិស្សសិ វត្ថុសាយិកោ, យថាកាមករណីយោ ពាហិតេយ្យោ’តិ.

‘‘អហម្បិ ខោ ឯវំ, ព្រហ្មេ, ជានាមិ – សចេ បថវិំ អជ្ឈោសិស្សាមិ, ឱបសាយិកោ តេ ភវិស្សាមិ វត្ថុសាយិកោ, យថាកាមករណីយោ ពាហិតេយ្យោ. ‘សចេ អាបំ… តេជំ… វាយំ… ភូតេ… ទេវេ… បជាបតិំ… ព្រហ្មំ អជ្ឈោសិស្សាមិ, ឱបសាយិកោ តេ ភវិស្សាមិ វត្ថុសាយិកោ, យថាកាមករណីយោ ពាហិតេយ្យោ’តិ អបិ ច តេ អហំ, ព្រហ្មេ, គតិញ្ច បជានាមិ, ជុតិញ្ច បជានាមិ – ឯវំ មហិទ្ធិកោ ពកោ ព្រហ្មា, ឯវំ មហានុភាវោ ពកោ ព្រហ្មា, ឯវំ មហេសក្ខោ ពកោ ព្រហ្មា’’តិ.

‘‘យថាកថំ បន មេ ត្វំ, មារិស, គតិញ្ច បជានាសិ, ជុតិញ្ច បជានាសិ – ‘ឯវំ មហិទ្ធិកោ ពកោ ព្រហ្មា, ឯវំ មហានុភាវោ ពកោ ព្រហ្មា, ឯវំ មហេសក្ខោ ពកោ ព្រហ្មា’តិ?

‘‘យាវតា ចន្ទិមសូរិយា, បរិហរន្តិ ទិសា ភន្តិ វិរោចនា;

តាវ សហស្សធា លោកោ, ឯត្ថ តេ វត្តតេ [វត្តតី (សី. ស្យា. កំ. បី.)] វសោ.

‘‘បរោបរញ្ច [បរោវរញ្ច (សី. បី.)] ជានាសិ, អថោ រាគវិរាគិនំ;

ឥត្ថភាវញ្ញថាភាវំ, សត្តានំ អាគតិំ គតិ’’ន្តិ.

‘‘ឯវំ ខោ តេ អហំ, ព្រហ្មេ, គតិញ្ច បជានាមិ ជុតិញ្ច បជានាមិ – ‘ឯវំ មហិទ្ធិកោ ពកោ ព្រហ្មា, ឯវំ មហានុភាវោ ពកោ ព្រហ្មា, ឯវំ មហេសក្ខោ ពកោ ព្រហ្មា’តិ.

៥០៤. ‘‘អត្ថិ ខោ, ព្រហ្មេ, អញ្ញោ កាយោ, តំ ត្វំ ន ជានាសិ ន បស្សសិ; តមហំ ជានាមិ បស្សាមិ. អត្ថិ ខោ, ព្រហ្មេ, អាភស្សរា នាម កាយោ យតោ ត្វំ ចុតោ ឥធូបបន្នោ. តស្ស តេ អតិចិរនិវាសេន សា សតិ បមុដ្ឋា, តេន តំ ត្វំ ន ជានាសិ ន បស្សសិ; តមហំ ជានាមិ បស្សាមិ. ឯវម្បិ ខោ អហំ, ព្រហ្មេ, នេវ តេ សមសមោ អភិញ្ញាយ, កុតោ នីចេយ្យំ? អថ ខោ អហមេវ តយា ភិយ្យោ. អត្ថិ ខោ, ព្រហ្មេ, សុភកិណ្ហោ នាម កាយោ, វេហប្ផលោ នាម កាយោ, អភិភូ នាម កាយោ, តំ ត្វំ ន ជានាសិ ន បស្សសិ; តមហំ ជានាមិ បស្សាមិ. ឯវម្បិ ខោ អហំ, ព្រហ្មេ, នេវ តេ សមសមោ អភិញ្ញាយ, កុតោ នីចេយ្យំ? អថ ខោ អហមេវ តយា ភិយ្យោ. បថវិំ ខោ អហំ, ព្រហ្មេ, បថវិតោ អភិញ្ញាយ យាវតា បថវិយា បថវត្តេន អននុភូតំ តទភិញ្ញាយ បថវិំ នាបហោសិំ, បថវិយា នាបហោសិំ, បថវិតោ នាបហោសិំ, បថវិំ មេតិ នាបហោសិំ, បថវិំ នាភិវទិំ. ឯវម្បិ ខោ អហំ, ព្រហ្មេ, នេវ តេ សមសមោ អភិញ្ញាយ, កុតោ នីចេយ្យំ? អថ ខោ អហមេវ តយា ភិយ្យោ. អាបំ ខោ អហំ, ព្រហ្មេ…បេ… តេជំ ខោ អហំ, ព្រហ្មេ…បេ… វាយំ ខោ អហំ, ព្រហ្មេ…បេ… ភូតេ ខោ អហំ, ព្រហ្មេ…បេ… ទេវេ ខោ អហំ, ព្រហ្មេ…បេ… បជាបតិំ ខោ អហំ, ព្រហ្មេ…បេ… ព្រហ្មំ ខោ អហំ, ព្រហ្មេ…បេ… អាភស្សរេ ខោ អហំ, ព្រហ្មេ…បេ… សុភកិណ្ហេ ខោ អហំ, ព្រហ្មេ… …បេ… វេហប្ផលេ ខោ អហំ, ព្រហ្មេ…បេ… អភិភុំ ខោ អហំ, ព្រហ្មេ…បេ… សព្ពំ ខោ អហំ, ព្រហ្មេ, សព្ពតោ អភិញ្ញាយ យាវតា សព្ពស្ស សព្ពត្តេន អននុភូតំ តទភិញ្ញាយ សព្ពំ នាបហោសិំ សព្ពស្មិំ នាបហោសិំ សព្ពតោ នាបហោសិំ សព្ពំ មេតិ នាបហោសិំ, សព្ពំ នាភិវទិំ. ឯវម្បិ ខោ អហំ, ព្រហ្មេ, នេវ តេ សមសមោ អភិញ្ញាយ, កុតោ នីចេយ្យំ? អថ ខោ អហមេវ តយា ភិយ្យោ’’តិ.

‘‘សចេ ខោ, មារិស, សព្ពស្ស សព្ពត្តេន អននុភូតំ, តទភិញ្ញាយ មា ហេវ តេ រិត្តកមេវ អហោសិ, តុច្ឆកមេវ អហោសី’’តិ.

‘‘‘វិញ្ញាណំ អនិទស្សនំ អនន្តំ សព្ពតោ បភំ’, តំ បថវិយា បថវត្តេន អននុភូតំ, អាបស្ស អាបត្តេន អននុភូតំ, តេជស្ស តេជត្តេន អននុភូតំ, វាយស្ស វាយត្តេន អននុភូតំ, ភូតានំ ភូតត្តេន អននុភូតំ, ទេវានំ ទេវត្តេន អននុភូតំ, បជាបតិស្ស បជាបតិត្តេន អននុភូតំ, ព្រហ្មានំ ព្រហ្មត្តេន អននុភូតំ, អាភស្សរានំ អាភស្សរត្តេន អននុភូតំ, សុភកិណ្ហានំ សុភកិណ្ហត្តេន អននុភូតំ, វេហប្ផលានំ វេហប្ផលត្តេ អននុភូតំ, អភិភុស្ស អភិភុត្តេន អននុភូតំ, សព្ពស្ស សព្ពត្តេន អននុភូតំ’’.

‘‘ហន្ទ ចរហិ [ហន្ទ ច ហិ (សី. បី.)] តេ, មារិស, បស្ស អន្តរធាយាមី’’តិ. ‘ហន្ទ ចរហិ មេ ត្វំ, ព្រហ្មេ, អន្តរធាយស្សុ, សចេ វិសហសី’តិ. អថ ខោ, ភិក្ខវេ, ពកោ ព្រហ្មា ‘អន្តរធាយិស្សាមិ សមណស្ស គោតមស្ស, អន្តរធាយិស្សាមិ សមណស្ស គោតមស្សា’តិ នេវស្សុ មេ សក្កោតិ អន្តរធាយិតុំ.

‘‘ឯវំ វុត្តេ, អហំ, ភិក្ខវេ, ពកំ ព្រហ្មានំ ឯតទវោចំ – ‘ហន្ទ ចរហិ តេ ព្រហ្មេ អន្តរធាយាមី’តិ. ‘ហន្ទ ចរហិ មេ ត្វំ, មារិស, អន្តរធាយស្សុ សចេ វិសហសី’តិ. អថ ខោ អហំ, ភិក្ខវេ, តថារូបំ ឥទ្ធាភិសង្ខារំ អភិសង្ខាសិំ – ‘ឯត្តាវតា ព្រហ្មា ច ព្រហ្មបរិសា ច ព្រហ្មបារិសជ្ជា ច សទ្ទញ្ច មេ សោស្សន្តិ [សទ្ទមេវ សុយ្យន្តិ (ក.)], ន ច មំ ទក្ខន្តី’តិ. អន្តរហិតោ ឥមំ គាថំ អភាសិំ –

‘‘ភវេវាហំ ភយំ ទិស្វា, ភវញ្ច វិភវេសិនំ;

ភវំ នាភិវទិំ កិញ្ចិ, នន្ទិញ្ច ន ឧបាទិយិ’’ន្តិ.

‘‘អថ ខោ, ភិក្ខវេ, ព្រហ្មា ច ព្រហ្មបរិសា ច ព្រហ្មបារិសជ្ជា ច អច្ឆរិយព្ភុតចិត្តជាតា អហេសុំ – ‘អច្ឆរិយំ វត ភោ, អព្ភុតំ វត ភោ! សមណស្ស គោតមស្ស មហិទ្ធិកតា មហានុភាវតា, ន ច វត នោ ឥតោ បុព្ពេ ទិដ្ឋោ វា, សុតោ វា, អញ្ញោ សមណោ វា ព្រាហ្មណោ វា ឯវំ មហិទ្ធិកោ ឯវំ មហានុភាវោ យថាយំ សមណោ គោតមោ សក្យបុត្តោ សក្យកុលា បព្ពជិតោ. ភវរាមាយ វត, ភោ, បជាយ ភវរតាយ ភវសម្មុទិតាយ សមូលំ ភវំ ឧទព្ពហី’តិ.

៥០៥. ‘‘អថ ខោ, ភិក្ខវេ, មារោ បាបិមា អញ្ញតរំ ព្រហ្មបារិសជ្ជំ អន្វាវិសិត្វា មំ ឯតទវោច – ‘សចេ ខោ ត្វំ, មារិស, ឯវំ បជានាសិ, សចេ ត្វំ ឯវំ អនុពុទ្ធោ, មា សាវកេ ឧបនេសិ, មា បព្ពជិតេ; មា សាវកានំ ធម្មំ ទេសេសិ, មា បព្ពជិតានំ; មា សាវកេសុ គេធិមកាសិ, មា បព្ពជិតេសុ. អហេសុំ ខោ, ភិក្ខុ, តយា បុព្ពេ សមណព្រាហ្មណា លោកស្មិំ អរហន្តោ សម្មាសម្ពុទ្ធា បដិជានមានា. តេ សាវកេ ឧបនេសុំ បព្ពជិតេ, សាវកានំ ធម្មំ ទេសេសុំ បព្ពជិតានំ, សាវកេសុ គេធិមកំសុ បព្ពជិតេសុ, តេ សាវកេ ឧបនេត្វា បព្ពជិតេ, សាវកានំ ធម្មំ ទេសេត្វា បព្ពជិតានំ, សាវកេសុ គេធិតចិត្តា បព្ពជិតេសុ, កាយស្ស ភេទា បាណុបច្ឆេទា ហីនេ កាយេ បតិដ្ឋិតា. អហេសុំ យេ បន, ភិក្ខុ, តយា បុព្ពេ សមណព្រាហ្មណា លោកស្មិំ អរហន្តោ សម្មាសម្ពុទ្ធា បដិជានមានា. តេ ន សាវកេ ឧបនេសុំ ន បព្ពជិតេ, ន សាវកានំ ធម្មំ ទេសេសុំ ន បព្ពជិតានំ, ន សាវកេសុ គេធិមកំសុ ន បព្ពជិតេសុ, តេ ន សាវកេ ឧបនេត្វា ន បព្ពជិតេ, ន សាវកានំ ធម្មំ ទេសេត្វា ន បព្ពជិតានំ, ន សាវកេសុ គេធិតចិត្តា ន បព្ពជិតេសុ, កាយស្ស ភេទា បាណុបច្ឆេទា បណីតេ កាយេ បតិដ្ឋិតា. តំ តាហំ, ភិក្ខុ, ឯវំ វទាមិ – ឥង្ឃ ត្វំ, មារិស, អប្បោស្សុក្កោ ទិដ្ឋធម្មសុខវិហារមនុយុត្តោ វិហរស្សុ, អនក្ខាតំ កុសលញ្ហិ, មារិស, មា បរំ ឱវទាហី’តិ.

‘‘ឯវំ វុត្តេ, អហំ, ភិក្ខវេ, មារំ បាបិមន្តំ ឯតទវោចំ – ‘ជានាមិ ខោ តាហំ, បាបិម, មា ត្វំ មញ្ញិត្ថោ – ន មំ ជានាតី’តិ. មារោ ត្វមសិ, បាបិម. ន មំ ត្វំ, បាបិម, ហិតានុកម្បី ឯវំ វទេសិ; អហិតានុកម្បី មំ ត្វំ, បាបិម, ឯវំ វទេសិ. តុយ្ហញ្ហិ, បាបិម, ឯវំ ហោតិ – ‘យេសំ សមណោ គោតមោ ធម្មំ ទេសេស្សតិ, តេ មេ វិសយំ ឧបាតិវត្តិស្សន្តី’តិ. អសម្មាសម្ពុទ្ធាវ បន តេ, បាបិម, សមានា សម្មាសម្ពុទ្ធាម្ហាតិ បដិជានិំសុ. អហំ ខោ បន, បាបិម, សម្មាសម្ពុទ្ធោវ សមានោ សម្មាសម្ពុទ្ធោម្ហីតិ បដិជានាមិ. ទេសេន្តោបិ ហិ, បាបិម, តថាគតោ សាវកានំ ធម្មំ តាទិសោវ អទេសេន្តោបិ ហិ, បាបិម, តថាគតោ សាវកានំ ធម្មំ តាទិសោវ. ឧបនេន្តោបិ ហិ, បាបិម, តថាគតោ សាវកេ តាទិសោវ, អនុបនេន្តោបិ ហិ, បាបិម, តថាគតោ សាវកេ តាទិសោវ. តំ កិស្ស ហេតុ? តថាគតស្ស, បាបិម, យេ អាសវា សំកិលេសិកា បោនោព្ភវិកា សទរា ទុក្ខវិបាកា អាយតិំ ជាតិជរាមរណិយា – តេ បហីនា ឧច្ឆិន្នមូលា តាលាវត្ថុកតា អនភាវំកតា អាយតិំ អនុប្បាទធម្មា. សេយ្យថាបិ, បាបិម, តាលោ មត្ថកច្ឆិន្នោ អភព្ពោ បុន វិរូឡ្ហិយា; ឯវមេវ ខោ, បាបិម, តថាគតស្ស យេ អាសវា សំកិលេសិកា បោនោព្ភវិកា សទរា ទុក្ខវិបាកា អាយតិំ ជាតិជរាមរណិយា – តេ បហីនា ឧច្ឆិន្នមូលា តាលាវត្ថុកតា អនភាវំកតា អាយតិំ អនុប្បាទធម្មាតិ.

‘‘ឥតិ ហិទំ មារស្ស ច អនាលបនតាយ ព្រហ្មុនោ ច អភិនិមន្តនតាយ, តស្មា ឥមស្ស វេយ្យាករណស្ស ព្រហ្មនិមន្តនិកំតេវ អធិវចន’’ន្តិ.

ព្រហ្មនិមន្តនិកសុត្តំ និដ្ឋិតំ នវមំ.