៣. ផលទាយកវិមានវត្ថុ

១០៦០. ‘‘ឧច្ចមិទំ មណិថូណំ វិមានំ, សមន្តតោ សោឡស យោជនានិ;

កូដាគារា សត្តសតា ឧឡារា, វេឡុរិយថម្ភា រុចកត្ថតា សុភា.

១០៦១. ‘‘តត្ថច្ឆសិ បិវសិ ខាទសិ ច, ទិព្ពា ច វីណា បវទន្តិ វគ្គុំ;

អដ្ឋដ្ឋកា សិក្ខិតា សាធុរូបា, ទិព្ពា ច កញ្ញា តិទសចរា ឧឡារា;

នច្ចន្តិ គាយន្តិ បមោទយន្តិ.

១០៦២. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១០៦៣. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១០៦៤. ‘‘ផលទាយី ផលំ វិបុលំ លភតិ, ទទមុជុគតេសុ បសន្នមានសោ;

សោ ហិ បមោទតិ [មោទតិ (សី. ស្យា. បី.)] សគ្គគតោ តិទិវេ [តត្ថ (ក.)], អនុភោតិ ច បុញ្ញផលំ វិបុលំ.

១០៦៥. ‘‘តវេវាហំ [តថេវាហំ (សី. ស្យា. បី.)] មហាមុនិ, អទាសិំ ចតុរោ ផលេ.

១០៦៦. ‘‘តស្មា ហិ ផលំ អលមេវ ទាតុំ, និច្ចំ មនុស្សេន សុខត្ថិកេន;

ទិព្ពានិ វា បត្ថយតា សុខានិ, មនុស្សសោភគ្គតមិច្ឆតា វា.

១០៦៧. ‘‘តេន មេតាទិសោ វណ្ណោ…បេ…

វណ្ណោ ច មេ សព្ពទិសា បភាសតី’’តិ.

ផលទាយកវិមានំ តតិយំ.