៧. ឧបោសថាវិមានវត្ថុ

២២៩. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ឱភាសេន្តី ទិសា សព្ពា, ឱសធី វិយ តារកា.

២៣០. ‘‘កេន តេតាទិសោ វណ្ណោ…បេ…

វណ្ណោ ច តេ សព្ពទិសា បភាសតី’’តិ.

២៣២. សា ទេវតា អត្តមនា…បេ… យស្ស កម្មស្សិទំ ផលំ.

២៣៣. ‘‘ឧបោសថាតិ មំ អញ្ញំសុ, សាកេតាយំ ឧបាសិកា;

សទ្ធា សីលេន សម្បន្នា, សំវិភាគរតា សទា.

២៣៤. ‘‘អច្ឆាទនញ្ច ភត្តញ្ច, សេនាសនំ បទីបិយំ;

អទាសិំ ឧជុភូតេសុ, វិប្បសន្នេន ចេតសា.

២៣៥. ‘‘ចាតុទ្ទសិំ បញ្ចទសិំ, យា ច បក្ខស្ស អដ្ឋមី;

បាដិហារិយបក្ខញ្ច, អដ្ឋង្គសុសមាគតំ.

២៣៦. ‘‘ឧបោសថំ ឧបវសិស្សំ, សទា សីលេសុ សំវុតា;

សញ្ញមា សំវិភាគា ច, វិមានំ អាវសាមហំ.

២៣៧. ‘‘បាណាតិបាតា វិរតា, មុសាវាទា ច សញ្ញតា;

ថេយ្យា ច អតិចារា ច, មជ្ជបានា ច អារកា.

២៣៨. ‘‘បញ្ចសិក្ខាបទេ រតា, អរិយសច្ចាន កោវិទា;

ឧបាសិកា ចក្ខុមតោ, គោតមស្ស យសស្សិនោ.

២៣៩. ‘‘តេន មេតាទិសោ វណ្ណោ…បេ…

វណ្ណោ ច មេ សព្ពទិសា បភាសតី’’តិ.

២៤១. ‘‘អភិក្ខណំ នន្ទនំ សុត្វា, ឆន្ទោ មេ ឧទបជ្ជថ [ឧបបជ្ជថ (ពហូសុ)];

តត្ថ ចិត្តំ បណិធាយ, ឧបបន្នម្ហិ នន្ទនំ.

២៤២. ‘‘នាកាសិំ សត្ថុ វចនំ, ពុទ្ធស្សាទិច្ចពន្ធុនោ;

ហីនេ ចិត្តំ បណិធាយ, សាម្ហិ បច្ឆានុតាបិនី’’តិ.

២៤៣. ‘‘កីវ ចិរំ វិមានម្ហិ, ឥធ វច្ឆសុបោសថេ [វស្សសុបោសថេ (សី.)];

ទេវតេ បុច្ឆិតាចិក្ខ, យទិ ជានាសិ អាយុនោ’’តិ.

២៤៤. ‘‘សដ្ឋិវស្សសហស្សានិ [សដ្ឋិ សតសហស្សានិ (?)], តិស្សោ ច វស្សកោដិយោ;

ឥធ ឋត្វា មហាមុនិ, ឥតោ ចុតា គមិស្សាមិ;

មនុស្សានំ សហព្យត’’ន្តិ.

២៤៥. ‘‘មា ត្វំ ឧបោសថេ ភាយិ, សម្ពុទ្ធេនាសិ ព្យាកតា;

សោតាបន្នា វិសេសយិ, បហីនា តវ ទុគ្គតី’’តិ.

ឧបោសថាវិមានំ សត្តមំ.