១. ទាសិវិមានវត្ថុ

១៥៧. ‘‘អបិ សក្កោវ ទេវិន្ទោ, រម្មេ ចិត្តលតាវនេ;

សមន្តា អនុបរិយាសិ, នារីគណបុរក្ខតា;

ឱភាសេន្តី ទិសា សព្ពា, ឱសធី វិយ តារកា.

១៥៨. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១៥៩. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១៦០. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

១៦១. ‘‘អហំ មនុស្សេសុ មនុស្សភូតា, ទាសី អហោសិំ បរបេស្សិយា [បរបេសិយា (ក.)] កុលេ.

១៦២. ‘‘ឧបាសិកា ចក្ខុមតោ, គោតមស្ស យសស្សិនោ;

តស្សា មេ និក្កមោ អាសិ, សាសនេ តស្ស តាទិនោ.

១៦៣. ‘‘កាមំ ភិជ្ជតុយំ កាយោ, នេវ អត្ថេត្ថ សណ្ឋនំ [សន្ថនំ (សី. ស្យា. បី.)];

សិក្ខាបទានំ បញ្ចន្នំ, មគ្គោ សោវត្ថិកោ សិវោ.

១៦៤. ‘‘អកណ្ដកោ អគហនោ, ឧជុ សព្ភិ បវេទិតោ;

និក្កមស្ស ផលំ បស្ស, យថិទំ បាបុណិត្ថិកា.

១៦៥. ‘‘អាមន្តនិកា រញ្ញោម្ហិ, សក្កស្ស វសវត្តិនោ;

សដ្ឋិ តុរិយ [តុរិយ (សី. ស្យា. បី.)] សហស្សានិ, បដិពោធំ ករោន្តិ មេ.

១៦៦. ‘‘អាលម្ពោ គគ្គរោ [គគ្គមោ (ស្យា.), ភគ្គរោ (ក.)] ភីមោ [ភិម្មោ (ក.)], សាធុវាទី ច សំសយោ;

បោក្ខរោ ច សុផស្សោ ច, វិណាមោក្ខា [វិលាមោក្ខា (ក.)] ច នារិយោ.

១៦៧. ‘‘នន្ទា ចេវ សុនន្ទា ច, សោណទិន្នា សុចិម្ហិតា [សុចិម្ភិកា (ស្យា.)];

អលម្ពុសា មិស្សកេសី ច, បុណ្ឌរីកាតិ ទារុណី.

១៦៨. ‘‘ឯណីផស្សា សុផស្សា ច, សុភទ្ទា មុទុវាទិនី;

ឯតា ចញ្ញា ច សេយ្យាសេ, អច្ឆរានំ បពោធិកា.

១៦៩. ‘‘តា មំ កាលេនុបាគន្ត្វា, អភិភាសន្តិ ទេវតា;

ហន្ទ នច្ចាម គាយាម, ហន្ទ តំ រមយាមសេ.

១៧០. ‘‘នយិទំ អកតបុញ្ញានំ, កតបុញ្ញានមេវិទំ;

អសោកំ នន្ទនំ រម្មំ, តិទសានំ មហាវនំ.

១៧១. ‘‘សុខំ អកតបុញ្ញានំ, ឥធ នត្ថិ បរត្ថ ច;

សុខញ្ច កតបុញ្ញានំ, ឥធ ចេវ បរត្ថ ច.

១៧២. ‘‘តេសំ សហព្យកាមានំ, កត្តព្ពំ កុសលំ ពហុំ;

កតបុញ្ញា ហិ មោទន្តិ, សគ្គេ ភោគសមង្គិនោ’’តិ.

ទាសិវិមានំ បឋមំ.