៧. បបញ្ចខយសុត្តំ

៦៧. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ភគវា អត្តនោ បបញ្ចសញ្ញាសង្ខាបហានំ បច្ចវេក្ខមានោ និសិន្នោ ហោតិ.

អថ ខោ ភគវា អត្តនោ បបញ្ចសញ្ញាសង្ខាបហានំ វិទិត្វា តាយំ វេលាយំ ឥមំ ឧទានំ ឧទានេសិ –

‘‘យស្ស បបញ្ចា ឋិតិ ច នត្ថិ,

សន្ទានំ បលិឃញ្ច វីតិវត្តោ;

តំ និត្តណ្ហំ មុនិំ ចរន្តំ,

នាវជានាតិ សទេវកោបិ លោកោ’’តិ. សត្តមំ;