៩. វិសាខាសុត្តំ

១៩. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ បុព្ពារាមេ មិគារមាតុបាសាទេ. តេន ខោ បន សមយេន វិសាខាយ មិគារមាតុយា កោចិទេវ អត្ថោ រញ្ញេ បសេនទិម្ហិ កោសលេ បដិពទ្ធោ [បដិពន្ធោ (បី. ក.)] ហោតិ. តំ រាជា បសេនទិ កោសលោ ន យថាធិប្បាយំ តីរេតិ.

អថ ខោ វិសាខា មិគារមាតា ទិវា ទិវស្ស [ទិវាទិវស្សេវ (ស្យា.), ទិវាទិវស្សេយេវ (បី.), ទិវា ទិវស្សយេវ (ក.)] យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នំ ខោ វិសាខំ មិគារមាតរំ ភគវា ឯតទវោច – ‘‘ហន្ទ កុតោ នុ ត្វំ, វិសាខេ, អាគច្ឆសិ ទិវា ទិវស្សា’’តិ? ‘‘ឥធ មេ, ភន្តេ, កោចិទេវ អត្ថោ រញ្ញេ បសេនទិម្ហិ កោសលេ បដិពទ្ធោ; តំ រាជា បសេនទិ កោសលោ ន យថាធិប្បាយំ តីរេតី’’តិ.

អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –

‘‘សព្ពំ បរវសំ ទុក្ខំ, សព្ពំ ឥស្សរិយំ សុខំ;

សាធារណេ វិហញ្ញន្តិ, យោគា ហិ ទុរតិក្កមា’’តិ. នវមំ;